Deliwr cyffuriau o Gaerdydd a oedd yn cynnig cyffuriau drwy neges destun i 100 o bobl ar yr un pryd

Mae deliwr cyffuriau o Gaerdydd a oedd yn gweithredu'r llinell gyffuriau ‘SPICE’ a oedd yn cyflenwi heroin a chrac cocên wedi cael ei garcharu.

Darganfu Uned Troseddau Cyfundrefnol Caerdydd a'r Fro mai Hassan Hassan, 20 oed o Adamsdown, oedd unig arweinydd y llinell gyffuriau a oedd yn cyflenwi cyffuriau Dosbarth A i'w chwsmeriaid.

Cafodd Hassan ei arestio gan swyddogion yr Heddlu Metropolitanaidd yn Llundain ar 17 Gorffennaf. Ceisiodd roi'r ffôn symudol a oedd yn rhan greiddiol o ymchwiliad yr heddlu i rywun arall wrth i'r swyddogion agosáu ato.

Drwy gynnal archwiliad fforensig o'r data ar ei ffôn, llwyddodd Heddlu De Cymru i gysylltu Hassan yn uniongyrchol â'r llinell gyffuriau. Llwyddodd swyddogion i ddangos ei fod wedi anfon yr un negeseuon testun yn cynnig crac cocên a heroin i gannoedd o bobl ar yr un pryd.

Cafodd Hassan ei gyhuddo a phlediodd yn euog i ymwneud â chyflenwi crac cocên a heroin ar 16 Awst.

Yn gynharach heddiw (dydd Mercher 18 Medi) cafodd ei garcharu am 41 mis yn Llys y Goron Caerdydd.

Hassan yn un o 25 o bobl a gafodd eu harestio yn ystod mis Gorffennaf gan Dîm Troseddau Cyfundrefnol Caerdydd a'r Fro. Yn ystod yr ymgyrch atal, atafaelwyd chwarter cilogram o grac cocên a £17,000 mewn arian parod. Cafodd cyfanswm o 21 o linellau cyffuriau hefyd eu hatal rhag masnachu.