Carcharu dyn am dreisio menyw pan oedd ar fechnïaeth am fod â delweddau anweddus yn ei feddiant

Mae dyn o'r Rhondda wedi cael ei garcharu am dreisio menyw ac am fod â delweddau anweddus yn ei feddiant. Treisiodd Mathew Pugh, 40 oed, fenyw pan na allai gydsynio ym mis Gorffennaf 2023.

Gwnaeth staff diogelwch a oedd yn gweithio ar safle cyfagos i'r man lle digwyddodd yr ymosodiad gysylltu â'r heddlu gyda phryderon am y dioddefwr agored i niwed ar ôl ei gweld ar deledu cylch cyfyng.

Cyrhaeddodd swyddogion ymhen munudau a daethant o hyd i'r dioddefwr gofidus. Roedd Mathew Pugh yn yr ardal o hyd a chafodd ei arestio yn dilyn ymchwiliad a'i gyhuddo o dreisio. Gwnaeth Heddlu De Cymru gais am remand, a chafodd y cais hwnnw ei gymeradwyo gan y llys.

Pan dreisiodd Pugh ei ddioddefwr, roedd ar fechnïaeth am fod â delweddau anweddus yn ei feddiant. Ym mis Mai 2023, cysylltodd pobl a oedd yn adnabod Pugh â'r heddlu ar ôl iddynt ddod o hyd i ddelweddau ar ei ffôn pan wnaethant ei fenthyg i wrando ar gerddoriaeth.

Ymatebodd swyddogion a gwnaethant atafaelu ffôn Pugh a'i arestio ar ôl iddynt ddod o hyd i gynnwys anghyfreithlon a oedd yn cynnwys delweddau Categori A. Cafodd ei gyhuddo tra roedd ar remand am dreisio.

Plediodd Mathew Pugh yn ddieuog o dreisio ym mis Chwefror eleni ond cafodd ei ganfod yn euog yn dilyn treial ym mis Gorffennaf.

Plediodd yn euog o fod â delweddau anweddus yn ei feddiant a'u rhannu.

Ddydd Gwener, 6 Medi, ymddangos gerbron Llys y Goron Caerdydd i'w ddedfrydu am yr holl droseddau, lle cafodd ei garcharu am 13 mlynedd gyda thrwydded estynedig o hyd at chwe blynedd.

Dywedodd y swyddog a fu'n ymwneud â'r achos, y Ditectif Gwnstabl Ashley Colston:

“Ni allai dioddefwr Pugh gydsynio mewn unrhyw ffordd i gyfathrach rywiol ar y noson y gwnaeth ei threisio. Rwy'n canmol dewrder y dioddefwr drwy gydol y broses hon, sydd wedi bod yn hir ac yn anodd. Byddwn yn parhau i sicrhau bod y dioddefwr yn cael y cymorth sydd ei angen arni. Heddiw, cafodd y cyfiawnder y mae'n ei haeddu ac rwy'n gobeithio bod hyn yn ei helpu i adfer ar ôl cyfnod trawmatig yn ei bywyd, a bod newyddion yr erlyniad hwn yn rhoi'r hyder i ddioddefwyr eraill gysylltu â ni. Mae'r delweddau y daethpwyd o hyd iddynt ar ffôn Pugh yn cadarnhau bod ei ffiniau rhywiol yn berygl i gymdeithas, sy'n lle mwy diogel gydag ef yn y carchar.”

 

Cyngor a chymorth i ddioddefwyr trais rhywiol ac ymosodiadau rhywiol