Mae dau gefnogwr tîm pêl-droed Dinas Caerdydd wedi cael Gorchmynion Gwahardd Pêl-droed am bum mlynedd

Mae dau ddyn wedi cael Gorchymyn Gwahardd Pêl-droed ynghyd â dedfrydau carchar wedi'u gohirio yn dilyn ymosodiad yn Stadiwm Dinas Caerdydd yn ystod gêm ddarbi De Cymru y tymor diwethaf.

Roedd y dioddefwr yn un o gefnogwyr tîm pêl-droed Dinas Abertawe, a oedd yn eistedd gyda grŵp o ffrindiau yn eisteddle'r tîm cartref ymhlith cefnogwyr y Dinas Caerdydd, ar 1 Ebrill 2023.

Pan sgoriodd Dinas Abertawe'r gôl fuddugol yn hwyr yn yr amser am anafiadau, neidiodd y dioddefwr i fyny yn reddfol i ddathlu ac ymosodwyd arno o ganlyniad i hyn.

Plediodd Steven Jones, 33 oed o Aberpennar, a Cory Jones, 28 oed o Abercynon, yn euog am ymosod ac affräe, a chafodd y ddau eu dedfrydu ddoe (ddydd Mawrth, 13 Mawrth) yn Llys y Goron Caerdydd.

Cafodd y brodyr eu hadnabod o ddeunydd Teledu Cylch Cyfyng a deunydd fideo oddi ar ffôn symudol, a oedd yn dangos y ddau'n dyrnu a chicio.

Ymyrrodd stiwardiaid y stadiwm ynghyd â chefnogwyr eraill er mwyn atal yr ymosodiad ac amddiffyn y dioddefwr a oedd wedi cael ei wthio i lawr tua 10 gris i mewn i res o seddi, cyn cael ei hebrwng allan o'r stadiwm.

Cafodd y dyn 23 oed o Gastell-nedd ei gludo mewn ambiwlans i Ysbyty Athrofaol Cymru, Caerdydd, lle cafodd ei drin am doriadau a chleisiau ar ei ben, ei gefn, a'i dorso.

Roedd deunydd fideo o'r dorf yn dangos Jones a Jones yn chwerthin yn yr ardal ymgynnull yn dilyn y digwyddiad.

Dywedodd Swyddog Pêl-droed Penodedig Dinas Caerdydd, PC Simon Chivers, o Heddlu De Cymru:

“Roedd yn ymddygiad gwarthus ac nid oes amheuaeth y bydd y rhan fwyaf o gefnogwyr Dinas Caerdydd, sy'n ymddwyn yn dda ac yn angerddol am eu clwb, wedi eu synnu gan y digwyddiad hwn.

“O ystyried nifer yr ergydion a chiciau a gafodd y dioddefwr i'w ben, rydym yn rhyfeddu nad arweiniodd yr ymosodiad hwn at anaf mwy difrifol.

“Lle ceir tystiolaeth o anrhefn neu drais yn gysylltiedig â phêl-droed, rydym bob amser yn ceisio erlyn y rheini sy'n gyfrifol er mwyn cymryd y camau priodol.

“Ni chaiff y math hwn o ymddygiad ei oddef yn Stadiwm Dinas Caerdydd.”

Ynghyd â'r Gorchymyn Gwahardd Pêl-droed, cafodd Steven Jones ddedfryd o 12 mis yn y carchar wedi'i gohirio am ddwy flynedd, a chafodd Cory Jones ei ddedfrydu i 15 mis yn y carchar wedi'i gohirio am ddwy flynedd.

Cafodd Cory Jones ei wneud yn destun gorchymyn ymatal rhag yfed alcohol am 120 diwrnod a rhaid iddo gwblhau 180 awr o waith di-dâl.

Cafodd Steven Jones ei wneud yn destun gorchymyn ymatal rhag yfed alcohol am 120 diwrnod, a rhaid iddo gwblhau 120 awr o waith di-dâl.

Rhaid i'r ddau ohonynt dalu iawndal o £500 i'r dioddefwr.