Dyn o Lanharan wedi ei ddedfrydu am gyflawni sawl trosedd rywiol ar blant
Cynnwys y prif erthygl
Cafodd Roger Stapleton, 75 oed, ei ddedfrydu yn Llys y Goron Caerdydd ddydd Gwener, 8 Mawrth, am gyflawni 15 trosedd rywiol dros gyfnod o 13 o flynyddoedd, a oedd yn cynnwys:
- Trais Rhywiol ar Blentyn o dan 13 oed.
- Ymosodiad Rhywiol drwy Dreiddiad ar Blentyn o dan 13 oed.
- Ymosodiad Rhywiol drwy Gyffwrdd Plentyn o dan 13 oed.
- Ymosodiad Rhywiol drwy Gyffwrdd
- Meddu ar Ddelweddau Anweddus Categori A o Blentyn
- Gwneud Delweddau Anweddus o Blentyn
Dywedodd y Ditectif Gwnstabl Julia Page: "Bu Roger Stapleton yn cam-drin ei ddioddefwr dros gyfnod sylweddol o amser, gan ddechrau'r cam-drin pan roedd y dioddefwr ond yn 5 oed.
"Cymerodd fantais pan roedd ei ddioddefwr ar ei fwyaf bregus o safbwynt oedran, a defnyddiodd hyn i'w dominyddu er ei les ei hun."
"Hoffwn ganmol y dioddefwr yn yr achos hwn am ei amynedd, dewrder a gwroldeb tra roedd yr ymchwiliad yn mynd yn ei flaen. Gall yr ymchwiliadau hyn gymryd amser, ond rwy'n gobeithio y bydd y ddedfryd hon yn dod â rhywfaint o ddiweddglo iddo."
Yn ogystal â'r ddedfryd o garchar, mae'n destun Gorchymyn Atal Niwed Rhywiol (SHPO) a bydd ar y Gofrestr Troseddwyr Rhyw am oes. Cafodd hefyd orchymyn atal ei osod yn erbyn ei ddioddefwr.
Dywedodd y Ditectif Ringyll Laura Jones: "Rydym yn ymchwilio i bob adroddiad am drais rhywiol, waeth pryd y digwyddodd y drosedd, ac yn rhoi anghenion y dioddefwr wrth wraidd ein hymchwiliadau.
"Byddem yn annog unrhyw un sydd wedi dioddef trais rhywiol a heb roi gwybod amdano, am ba reswm bynnag, i gysylltu â ni. Byddwn yn gwrando arnoch.”
Gofynnwch am help a chymorth os ydych chi neu rywun rydych yn ei adnabod wedi dioddef trais rhywiol, ymosodiad rhywiol neu drosedd rywiol arall. Fyddwn ni ddim yn eich barnu: byddwn yn eich trin â sensitifrwydd a pharch, a byddwn bob amser yn rhoi eich iechyd a'ch llesiant yn gyntaf.