Cyrch ar dŷ gamblo anghyfreithlon fel rhan o gamau dwysáu cenedlaethol gan yr heddlu yn erbyn twyll

Gwnaeth swyddogion o Uned Troseddau Cyfundrefnol Ranbarthol (ROCU) Tarian, gan weithio mewn partneriaeth â'r Comisiwn Gamblo, CThEF ac Adran Drwyddedu Cyngor Dinas Caerdydd, gynnal chwe gwarant ledled Caerdydd ddydd Mercher, 28 Chwefror, ar ôl cael cuddwybodaeth fod tŷ gamblo anghyfreithlon yn gweithredu yn y Sblot.

Cafodd dau ddyn eu harestio ar amheuaeth o wyngalchu arian a throseddau o dan y ddeddf gamblo. Aethpwyd ati i chwilio drwy'r tŷ gamblo, a oedd ar lawr cyntaf uned ddiwydiannol yn y Sblot, a chafodd yr holl gyfarpar gamblo ei atafaelu a'i gludo ymaith. Roedd hyn yn cynnwys chwe bwrdd pocer, olwyn wobrau sy'n troelli, darnau arian a tsips pocer, a sawl teledu sgrin wastad.

Dywedodd Kay Roberts, Cyfarwyddwr Gweithredol Gweithrediadau yn y Comisiwn Gamblo, “Rydym yn ymrwymedig i fynd i'r afael â gweithgarwch gamblo anghyfreithlon ledled y DU a byddwn yn parhau i weithio'n agos gyda sefydliadau gorfodi'r gyfraith ac asiantaethau partner i gyflawni hyn.”

Cynhaliwyd cyrch yn y lleoliad yng Nghaerdydd fel rhan o Ymgyrch Henhouse, sef cyfnod dwysáu mis o hyd yn erbyn twyll. Ariannwyd Ymgyrch Henhouse gan y Ganolfan Troseddau Economaidd Genedlaethol ac roedd yn ymdrech ar y cyd gan sawl heddlu, unedau troseddau cyfundrefnol ac asiantaethau partner ledled y DU.

Uned Troseddau Cyfundrefnol Ranbarthol Tarian wnaeth gydlynu'r gweithgarwch yn ne Cymru. Gyda'i gilydd, cafodd chwe unigolyn eu harestio, cynhaliwyd saith gwarant, a rhoddwyd dros 10 hysbysiad ymatal i unigolion a oedd yn cyflawni troseddau twyll a gwyngalchu arian ledled y rhanbarth.

Dywedodd y Ditectif Ringyll Emma Brown, o Uned Troseddau Economaidd Ragweithiol Tarian: “Twyll yw'r drosedd a gaiff ei chofnodi amlaf yng Nghymru a Lloegr bellach ac, yn aml, caiff ei chyflawni ar y cyd â throseddau difrifol eraill, fel gwyngalchu arian.

Yn ystod cyfnod dwysáu Ymgyrch Henhouse, rydym wedi arestio unigolion dan amheuaeth o Dwyll drwy Ymhoniad Anwir a gwyngalchu arian, ynghyd â chynnal gwarantau mewn perthynas â dosbarthu ‘Firesticks’ teledu anghyfreithlon.

Mae ein timau ymgysylltu wedi cynnal sesiynau i godi ymwybyddiaeth o seiberdroseddu a thwyll gyda grwpiau cymunedol, colegau a phrifysgolion a busnesau hefyd, er mwyn helpu i atal pobl rhag dioddef twyll.

I gael cyngor ar sut i adnabod y tactegau a'r technegau a ddefnyddir yn gyffredin gan dwyllwyr, ac i helpu i leihau eich risg o ddioddef twyll, ewch i'r wefan Stop! Think Fraud newydd yn stopthinkfraud.campaign.gov.uk/cy/hafan/

 

Os byddwch yn amau eich bod wedi dioddef twyll, ewch i wefan Action Fraud am gyngor yn www.actionfraud.police.uk a rhowch wybod ar-lein neu drwy ffonio 0300 123 2040.”