Gang llinellau cyffuriau ‘Goldie’ yn cael cyfanswm dedfryd o 36 o flynyddoedd

Cyflwynwyd y ddedfryd derfynol ar gyfer ymgyrch llinellau cyffuriau ‘Goldie’ yn Llys y Goron Caerdydd ddydd Gwener, 15 Mawrth.

Roedd Ymgyrch 'Goldie' yn ymchwiliad cymhleth i Grŵp Troseddau Cyfundrefnol llinellau cyffuriau ‘Goldie’. Roedd llinell ‘Goldie’ yn cael ei rheoli o Lundain o 19 Hydref 2018 a 23 Mai 2019, a gwnaeth diamorffin (heroin) ansawdd uchel a chrac cocên gyda'r ddau'n gwneud cyfanswm o 3.29 cilogram lifo drwy ardal Pen-y-bont ar Ogwr.

Yn ystod sawl cam gorfodi ym Mhen-y-bont ar Ogwr a Llundain, arestiwyd naw unigolyn ac, yn dilyn hynny, cawsant eu canfod yn euog o droseddau Masnachu mewn Cyffuriau a Deddf Enillion Troseddau.

Pennaeth y llinell cyffuriau oedd Caine Morris-McGibbon (neu ‘Goldie’), a oedd yn rheoli'r ‘llinell’ o Dde Llundain, gyda rhwydwaith o unigolion yn chwarae rôl hanfodol o ran hwyluso'r broses o gyflenwi cyffuriau i mewn i Ben-y-bont ar Ogwr neu alluogi cyfrifon banc er mwyn gallu talu'r enillion i mewn iddynt. 

• Roedd Santana Donegan a Dejuan Bell yn masnachu'r cyffuriau o Lundain i Dde Cymru ac yn rheoli'r broses o ddelio yn uniongyrchol i gwsmeriaid.
• Gwnaeth Menna Thomas ganiatáu i'w safle ym Mhencoed gael ei ddefnyddio fel sylfaen i Linell ‘Goldie’ weithredu ohono, lle roedd y cyffuriau'n cael eu paratoi a'u storio cyn eu dosbarthu i ddefnyddwyr Dosbarth A yn ardal Pen-y-bont ar Ogwr ac o'i chwmpas.
• Llogodd John Hauxwell y cerbyd a ddefnyddiwyd ganddo ef ac aelodau'r gang i ddosbarthu'r cyffuriau Dosbarth A.
• Hwylusodd Shaquile Oduleye a Tenika Brown y broses o drosglwyddo'r arian o'u cyfrifon i Morris-McGibbon.
• Rhoddodd Aisha Mills a Joanne Gordon ganiatâd i'w safle yn Ne Llundain storio symiau cyfanwerthol o ddiamorffin (heroin), crac cocên, cyfryngau torri ac arfau ynghyd â hwyluso trosglwyddiadau arian i McGibbon.
• Yn ogystal, masnachodd Morris-McGibbon fachgen 16 oed i weithio fel rhan o'i fusnes delio mewn cyffuriau.

Dywedodd y Ditectif Ringyll Richard Gregory: “Rydym wedi tarfu ar gang mawr sy'n delio mewn cyffuriau trwy linellau cyffuriau, gan garcharu 9 unigolyn a oedd yn rhan o gynllwyn cyfundrefnol sylweddol ar ôl ymgyrch dros bum mlynedd sydd wedi tynnu nifer mawr o bobl beryglus a sylweddau peryglus oddi ar y strydoedd”.

“Gwelodd yr achos swyddogion yn mynd trwy swm helaeth o ddata cyfryngol, dadansoddi ffonau, system adnabod rhifau ceir yn awtomatig ynghyd â phrosesau gorfodi fforensig a thactegol yr oedd angen eu troslunio er mwyn rhoi achos manwl o erlyn gerbron.”

“Byddwn yn parhau i fynd ati i dargedu'r rhai rydym yn credu eu bod yn ymhèl â chyffuriau ac yn defnyddio'r pwerau sydd gennym i wneud yn siŵr y caiff eu gweithgareddau eu tarfu arnynt.

Dyma'r naw a oedd ynghlwm:

• Caine Jardel Morris-McGibbon – 26 oed, o Lundain - 11 mlynedd a 6 mis.
• Santana Donegan – 23 oed, o Camberwell, Llundain - 8 mlynedd.
• Dejuan Maurice Bell – 24 oed, o Lambeth, Llundain - 8 mlynedd.
• Menna Louise Thomas – 29, Pencoed, Pen-y-bont ar Ogwr - 6 blynedd a 6 mis
• John Hauxwell – 46 oed, o Fracla - Dedfryd ohiriedig o ddwy flynedd.
• Shaquile Oduleye – 27 oed, o Dde Lambeth - Gorchymyn Cymunedol ar gyfer troseddau'r Ddeddf Enillion Troseddau.
• Tenika Brown – 31 oed, o Lambeth, Llundain - Gorchymyn Cymunedol ar gyfer troseddau'r Ddeddf Enillion Troseddau.
• Aisha Mills – 26 oed, o Croydon - Gorchymyn Cymunedol ar gyfer troseddau'r Ddeddf Enillion Troseddau.
• Joanne Gordon – 49 oed, o Lundain - Gorchymyn Cymunedol ar gyfer troseddau'r Ddeddf Enillion Troseddau.

Ychwanegodd y Ditectif Gwnstabl Adam Yeates: “Mae troseddau llinellau cyffuriau yn parhau i fod yn broblem sy'n golygu camfanteisio ar unigolion agored i niwed yn aml er mwyn cyflenwi cyffuriau anghyfreithlon sy'n peri niwed i'n cymunedau.

“Mae'r ddedfryd hon yn anfon neges glir y bydd unigolion sy'n cymryd rhan wrth gyflenwi a chludo cyffuriau niweidiol i'n cymunedau yn dod o flaen eu gwell ac ymdrinnir yn gadarn â nhw.”