Lleidr adnabyddus wedi'i ddal ar gamera yn dwyn parseli mewn bag Just Eat

 

Gwnaeth Phillip Thompson esgus ei fod yn dosbarthu bwyd ond yn lle, torrodd i mewn i gartrefi ac ardaloedd cymunedol adeiladau ledled Caerdydd a Phenarth.

Ar ôl iddo gael ei arestio, cyfaddefodd i dorri i mewn i gyfanswm o 79 o eiddo.

Dywedodd y swyddog yn yr achos, y Ditectif Ringyll Andrew Coakley, o Heddlu De Cymru:

“Defnyddiodd Phillip Thompson dactegau gwahanol i fynd i mewn i eiddo.
“Yn ogystal â defnyddio grym a manteisio ar ddrws neu ffenestr agored, aeth hefyd i neuadd breswyl myfyrwyr gyda phot paent, gan honni mai addurnwr ydoedd, a chafodd hefyd afael ar fag tecawê Just Eat, gan honni ei fod yn dosbarthu bwyd.
“Yn anffodus iddo, cafodd ei ddal ar deledu cylch cyfyng, ac o'r lluniau hynny, gwnaethom ei adnabod drwy ddefnyddio technoleg Adnabod Wynebau Ôl-weithredol.”

 

Mae'r deunydd teledu cylch cyfyng isod yn ei ddangos yn dwyn parseli o ardal gymunedol Quayside yn Butetown.

 

 

Cafodd Thompson ei arestio ym mis Tachwedd 2023 ar amheuaeth o 11 o fwrgleriaethau.

Tra roedd ar remand yn aros am dreial, parhaodd ditectifs i ymchwilio i ddigwyddiadau tebyg eraill.

Cafodd y dyn 35 oed o Adamsdown ei ailgyfweld, a chyfaddefodd i 69 o fwrgleriaethau pellach yng Nghaerdydd a Phenarth rhwng mis Gorffennaf 2023 a mis Ionawr 2024.

Yna, plediodd yn euog yn Llys y Goron Caerdydd ac ar 9 Mai 2024, cafodd ei ddedfrydu i saith mlynedd ac un mis yn y carchar am ymosodiad, ymddygiad gorfodaethol a rheolaethol a 10 o fwrgleriaethau preswyl. Rhoddwyd ystyriaeth i'r 69 o fwrgleriaethau pellach.

Ychwanegodd DS Coakley:

"Rydym yn cymryd bwrgleriaethau o ddifrif a byddwn yn defnyddio'r holl dechnoleg sydd ar gael i ddwyn troseddwyr o flaen eu gwell.
"Rydym yn gobeithio y bydd canlyniad yr ymchwiliad hwn yn rhoi rhywfaint o gysur i'r dioddefwyr ac yn rhoi sicrwydd i'r gymuned ehangach o ran ein hymrwymiad i ymchwilio i fwrgleriaethau.”

Hoffwn atgoffa preswylwyr sy'n byw mewn blociau o fflatiau i fod yn ofalus iawn wrth adael dieithriaid i mewn i'r adeilad.

 

Roedd yr eiddo a dargedwyd gan Thompson yn cynnwys:

1. Empire Way, Grangetown
2. Liberty Park, Grangetown
3. The Bakery, Grangetown
4. St Stephens Mansions, Bae Caerdydd
5. Cathedral Gardens, Pontcanna
6. The Old Brewery Quarter, Canol Dinas Caerdydd
7. Ocean Buildings, Bae Caerdydd
8. Richmond Road, y Rhath
9. Galleon Way, Glanfa'r Iwerydd
10. Messina House, Bae Caerdydd
11. Nomad Backpackers, Adamsdown
12. Wordsworth Court, y Rhath
13. River Walk, Penarth
14. Millennium View, Glan yr Afon
15. Quayside, Butetown
16. Knightsbridge House, Penarth
17. The Landings, Penarth
18. Amalfi House, Butetown
19. The Boulevard, Treganna
20. Limetree Mansions, Gabalfa