Dyn o'r Cymoedd wedi'i ganfod â thoreth o gyffuriau, arfau tanio a nwyddau wedi'u dwyn

 

Mae deliwr cyffuriau o'r Cymoedd wedi'i garcharu ar ôl i gyrch ar gynhwysydd morgludo a oedd yn eiddo iddo arwain swyddogion at symiau helaeth o gyffuriau, arfau tanio, arian parod a cherbydau wedi'u dwyn.

Cynhaliodd swyddogion chwiliad o dan warant mewn cynhwysydd a oedd yn eiddo i David Smith, 25 oed, yn Nhonypandy ym mis Ionawr eleni.

Yno, daethant o hyd i symiau o amffetamin a chanabis, cyfarpar cyflenwi cyffuriau, car wedi'i ddwyn a beic modur oddi ar y ffordd wedi'i ddwyn.

Yn ystod chwiliadau dilynol o gerbyd arall a'i gartref, daethpwyd o hyd i ddau ddryll llifiedig, gwn llaw, cetris dryll, gwn taser wedi'i weddnewid yn dortsh, symiau pellach o gyffuriau anghyfreithlon y canfuwyd yn ddiweddarach mai cocên ac opioidau cryf iawn oeddent, £17,000 mewn arian parod a ffonau symudol a chyfarpar sy'n gysylltiedig â chyflenwi cyffuriau cyfanwerthol.

 

Plediodd Smith o Francis Street, Cwm Clydach, yn euog i ddau achos o fod ag arf tanio wedi'i wahardd yn ei feddiant, bod ag arf tanio wedi'i weddnewid yn ei feddiant, bod ag arf wedi'i wahardd yn ei feddiant, bod â chyffuriau Dosbarth A a B yn ei feddiant gyda'r bwriad o'u cyflenwi, a bod â sylwedd seicoweithredol yn ei feddiant gyda'r bwriad o'i gyflenwi.

Cafodd ei ddedfrydu yn Llys y Goron Merthyr Tudful i 12 mlynedd yn y carchar.

Cafodd ei gyd-droseddwr, Coran Davies, 22 oed – a oedd yn gyrru car wedi'i ddwyn pan geisiodd y ddau ffoi wrth i'r heddlu gyrraedd i gynnal y chwiliad o dan warant – ddedfryd ohiriedig o 12 mis. Plediodd yn euog i fod â sylwedd seicoweithredol yn ei feddiant gyda'r bwriad o'i gyflenwi, bod â chyffuriau Dosbarth B yn ei feddiant gyda'r bwriad o'u cyflenwi, a thrafod nwyddau wedi’u dwyn.

Dywedodd y Ditectif Arolygydd Russell Jenkins:

"Roedd David Smith yn gwneud swm sylweddol o arian drwy ei ymgyrch anghyfreithlon, ac nid oedd yn poeni dim am y gofid yr oedd yn ei achosi i'r gymuned leol a thu hwnt.

"Yn y llys, cyfeiriodd yr erlyniad at gryfder yr opioidau a oedd yn cael eu gwerthu fel 'heroin ffug' gan Smith; roeddent ganwaith yn fwy cryf na heroin ac yn beryglus tu hwnt. Mae hyn yn dangos ei ddiystyrwch tuag at y rhai yr oedd yn eu cyflenwi, a'i barodrwydd i fod ag arfau tanio yn ei feddiant er mwyn diogelu ei ymgyrch ar bob cyfrif.

"Rydym yn gobeithio y bydd y ddedfryd hon yn rhybudd i eraill sy'n rhan o'r fath drosoddoleb, ac yn rhoi tawelwch meddwl i'n cymunedau. Byddwn yn mynd ati'n ddiflino i ddal troseddwyr didrugaredd a byddwn yn gwneud popeth o fewn ein gallu i ddod o hyd i dystiolaeth – ni waeth pa mor gymhleth neu soffistigedig yw'r ymgyrch – i'w dwyn o flaen eu gwell."