Aelodau gang troseddau cyfundrefnol o Abertawe wedi eu carcharu am 25 mlynedd

Ar ôl pedair blynedd a dau dreial, mae pum dyn wedi eu carcharu ar ôl arwain ymgyrch cyffuriau dosbarth A gyfundrefnol flaenllaw.

Dechreuodd ym mis Ebrill 2020, pan gafodd Sameh Mohammed, 24 oed, ei stopio yn Abertawe gan Swyddogion yr Heddlu yn dilyn adroddiadau am achosion o ddelio cyffuriau yn yr ardal.

Pan gafodd ei chwilio, atafaelwyd cyffuriau a chafodd ei arestio. Wrth chwilio ei gartref ymhellach, daethpwyd o hyd i Sulieman Miskry, 30 oed, ynghyd ag arian parod, canabis, cetamin, cocên, ffonau symudol a pharaffernalia sy'n gysylltiedig â chyflenwi cyffuriau.

Roedd y ddau ddyn yn esgus bod yn fyfyrwyr ym Mhrifysgol Abertawe ac yn cyflenwi cyffuriau i'r boblogaeth o fyfyrwyr yn y ddinas. Heb yn wybod i'r swyddogion ar y pryd, roedd y ddau yn frodyr ac o Lundain.

Ym mis Ebrill 2021, ymddangosodd Miskry a Mohammed yn Llys y Goron Abertawe am dreial.

Fodd bynnag, cafodd y treial ei stopio gan y Barnwr ar ôl i Miskry gyflwyno tystiolaeth newydd i gefnogi ei alibi. Roedd hyn yn cynnwys derbynebau hedfan a thystiolaeth ychwanegol a oedd yn profi nad oedd yn y wlad ar adeg y troseddau.

Cafodd y ddau eu rhyddhau'n ddiweddarach, a threfnwyd aildreial.

Fis Medi 2021, atafaelwyd swm sylweddol o gyffuriau o lety myfyrwyr yn ardal Uplands y ddinas.

Roedd Miskry a Mohammed yn byw yn yr eiddo a oedd yn union drws nesaf i ble yr atafaelwyd y cyffuriau, gan eu cysylltu nhw â'r cyflenwi cyffuriau. Darparodd y ffonau a atafaelwyd ragor o dystiolaeth am ymgyrch llinellau cyffuriau sylweddol a chyfundrefnol. Cafodd Miskry a Mohammed eu harestio a'u cyhuddo am yr eildro.

Atafaelwyd lluniau PDF oddi ar ffôn Miskry yn dilyn ymchwiliad trylwyr, a oedd yn gysylltiedig â'r dystiolaeth a ddefnyddiwyd ar gyfer ei alibi yn y treial cyntaf. Yn ôl pob golwg, roedd y dogfennau PDF wedi cael eu haddasu'n ddigidol gan Miskry i ddarparu tystiolaeth anwir o'i alibi. Cafodd ei arestio'n ddiweddarach ar amheuaeth o Wyrdroi Cwrs Cyfiawnder, a'i gyhuddo.

Cafodd Christopher Marston, 22 oed, Adrian Edokpolar, 21 oed, a Christopher John, 23 oed hefyd eu harestio o ganlyniad i'r dystiolaeth a oedd yn eu cysylltu nhw â'r cyflenwi cyffuriau cyfundrefnol.

Plediodd pedwar o'r dynion yn euog, a phlediodd Miskry yn ddieuog.

Yn dilyn treial pedair wythnos o hyd, cafodd ei euogfarnu am bob un o'r 24 o gyhuddiadau.

Ddydd Gwener 12 Ionawr 2024, cafodd pob un o'r diffynyddion eu dedfrydu i gyfanswm o 25 mlynedd a saith mis yn y carchar.

Sulieman Miskry, 30 oed, o Lundain:            13 mlynedd yn y ddalfa

Sameh Mohamed, 24 oed, o Lundain:        4 blynedd ac 11 mis

Chris Marston, 22 oed, o Abertawe:           3 blynedd ac 1 mis

Adrian Edokpolar, 21 oed, o Lundain:         2 flynedd a 5 mis

Christopher John, 23 oed, o Abertawe:   2 flynedd a 2 mis.

Dywedodd y Ditectif Arolygydd Marc Gardner: "Roedd hwn yn ymchwiliad cymhleth a hir a gynhaliwyd gan Dîm Troseddau Cyfundrefnol Abertawe.

"Roedd yn cynnwys llwybrau ymholi di-rif, a chafodd ei gynnal yn fedrus iawn gan DC Andrew Henderson. Arweiniodd dull ymchwilio diflino a phenderfynol y tîm tuag at yr achos hwn at ganlyniadau eithriadol."