Cafodd saith o bobl eu hanfon i'r carchar am mwy na 82 o flynyddoedd

Cafodd saith o bobl eu hanfon i'r carchar am gyfanswm o 82 o flynyddoedd a deg mis yn Llys y Goron Caerdydd heddiw (dydd Gwener 16 Medi) am gyfres o droseddau yn ymwneud â chyffuriau. 

Daethpwyd â'r dynion gerbron y Llys yn dilyn ymchwiliad hir a chymhleth gan Tarian, sef Uned Troseddau Cyfundrefnol Rhanbarthol De Cymru a oedd yn ymestyn dros ardaloedd heddlu De Cymru a Dyfed-Powys. 

Yn ystod yr ymchwiliad, atafaelwyd arian parod, cyffuriau a pharaffernalia a oedd dan amheuaeth o fod ynghlwm â delio mewn cyffuriau, gan gynnwys:

Tua £100,000 o arian parod.

Tua 1000 o blanhigion canabis.

18kg o ganabis.

7kg o gocên.

Peiriannau cyfrif arian parod a chloriannau pwyso diwydiannol. 

O ganlyniad i hyn, arestiwyd naw dyn a'u dwyn i dreial. Ymhlith y naw dyn roedd:

Fation Bardhaj, 39 oed, o Ben-y-lan, Caerdydd  - dedfryd:  13 blynedd 6 mis

Klodian Zefi, 35 oed, o'r Rhath, Caerdydd - dedfryd: 14 blynedd

Gregory Hardy, 34 oed, o Waunarlwydd, Abertawe – dedfryd: 14 blynedd

Elon Joseph, 34 oed, o Waunarlwydd, Abertawe – dedfryd: 9 blynedd

Bardhok Bardhoj, 51 oed o Gilcennin, Ceredigion - dedfryd: 19 blynedd

David Price, 50 oed o Gynffig, Pen-y-bont ar Ogwr – dedfryd:   9 blynedd

Abdi Lekaj, 62 oed, o'r Rhath, Caerdydd – dedfryd: 4 blynedd 4 mis

Bydd dau eraill, Mirsad Nerguti, 21 oed, a Qazim Hodollari, 38 oed, o Lundain, yn cael eu dedfrydu yn ddiweddarach.

Dywedodd y Ditectif Ringyll Peter Kelly: “Ymchwiliad dan arweiniad Tarian yw Ymgyrch Bluebell a oedd yn ymchwilio i Grŵp Troseddau Cyfundrefnol yng Nghaerdydd a oedd yn gyfrifol am gael gafael ar sawl cilogram o gocên a'i ddosbarthu drwy Dde Cymru. 

“Arweiniodd yr ymchwiliad at sawl atafaeliad, a oedd yn gwneud cyfanswm o 7 cilogram o gocên (gyda gwerth amcangyfrifedig ar y stryd o bron i £600,000), 18 cilogram o ganabis (gyda gwerth amcangyfrifedig ar y stryd o £175,000), tua £100,000 o arian parod, ynghyd â dymchwel gwaith tyfu canabis o faint diwydiannol yn Llanbedr Pont Steffan gyda gwerth stryd posibl o dros £500,000. 

“Roedd Klodian Zefi, Fation Bardhaj a Bardhok Bardhoj yn cydweithio yng Nghaerdydd gan hwyluso'r gwaith o gyflenwi'r cocên. Roedd eu safleoedd cwsmeriaid yn cynnwys ardaloedd Abertawe a Phort Talbot. 

“Gregory Hardy oedd pennaeth y Grŵp Troseddau Cyfundrefnol yn Abertawe. Roedd ganddo fynediad at uned fusnes yng Ngorseinon, Abertawe. Pan gafodd hon ei chwilio, atafaelwyd gwasg hydrolig, ynghyd â pharaffernalia cyffuriau eraill a deunydd lapio cocên maint cilogram gwag. Roedd Elon Joseph yn gweithio i Hardy ac fe'i gwelwyd yn ymweld â'r uned fusnes yng Ngorseinon yn aml, yn ogystal â chyfarfod â Bardhok Bardhoj yn Abertawe a Chaerdydd yn aml. 

“Hardy hefyd oedd yn gyfrifol am sefydlu'r fferm ganabis yn Llanbedr Pont Steffan. Pan ddechreuwyd cynhyrchu'r canabis, Bardhoj oedd yn gyfrifol am dyfu a chynnal a chadw'r planhigion. 

“Roedd David Price yn gweithio fel cludydd y grŵp yn ardaloedd Port Talbot a'r Pîl a'r cyffiniau. Cafodd ei weld yn cyfarfod â Bardhok Bardhoj a Fation Bardhaj mewn lleoliadau amrywiol lle cafodd bagiau a phecynnau eu cyfnewid. 

“Roedd Qazim Hodollari yn gweithio fel cludwr ac roedd yn gyfrifol am deithio o ardal Llundain i gludo cyffuriau i Dde Cymru ac i gasglu arian parod. 

“Roedd Mirsad Negruti wedi'i leoli yn Llundain. Ar un achlysur, trefnodd Bardhok Bardhoj i Abdi Lekaj deithio o Gaerdydd i Lundain i gyfarfod â Negruti. Pan oedd Lekaj yn teithio'n ôl i Dde Cymru, cafodd ei arestio a chanfuwyd bod ganddo 2 gilogram o gocên yn ei feddiant. Gwnaeth tystiolaeth fforensig gysylltu Mirsad Negruti â'r atafaeliad hwn. 

Ychwanegodd y Ditectif Ringyll Kelly: “Megis rhan fach o'r gwaith rydym yn ei wneud o fewn Tarian i wneud ardaloedd de Cymru yn amgylchedd gelyniaethus i droseddau cyffuriau yw llwyddiant yr ymchwiliad hwn. 

“Roedd yr ymgyrch hon yn ymgyrch ddwys, a lwyddodd diolch i gydweithrediad gwahanol heddluoedd ledled De Cymru. 

“Bydd Tarian yn parhau i fynd i'r afael â'r diflastod y mae cyffuriau yn ei achosi i'n cymunedau. Mae llwyddiant yr ymchwiliad hwn hyd yma yn dangos y byddwn yn mynd ar drywydd y rhai sy'n cymryd rhan mewn troseddau graddfa fawr yn ddiflino i sicrhau cyfiawnder effeithiol yn erbyn yr unigolion hynny a'u bod yn cael eu dwyn gerbron y Llysoedd.

“Os byddwch dan amheuaeth bod gweithgareddau delio cyffuriau ar waith neu os byddwch yn poeni y gall rhywun ifanc neu oedolyn agored i niwed fod wedi'i dargedu gan grŵp troseddau cyfundrefnol, rhowch wybod i ni. Nid oes angen i chi fod yn bendant, dim ond yn bryderus.

“Ffoniwch ni ar 101, neu gallwch gysylltu â Taclo'r Tacle i roi gwybod yn ddienw os byddai'n well gennych wneud hynny – ar-lein neu drwy ffonio 0800 555 111. Os oes rhywun mewn perygl uniongyrchol neu os yw trosedd yn mynd rhagddi, dylech ffonio 999 bob amser.”