Targedu troseddau sy’n ymwneud ag alcohol y gaeaf hwn gyda mwy o batrolau gweladwy ac mewn dillad plaen

Bydd timau plismona ar batrôl y gaeaf hwn mewn mannau lle mae bywyd nos er mwyn targedu trosedd ac ymddygiad gwrthgymdeithasol sy’n gysylltiedig â chyfnod y Nadolig a’r Flwyddyn Newydd.

Bydd timau gweladwy a dillad plaen Heddlu De Cymru yn gweithredu mewn trefi a chanolfannau gan gynnwys Abertawe, Castell-nedd, Port Talbot, Pen-y-bont ar Ogwr, a Chaerdydd i fonitro ymddygiad gwrthgymdeithasol sy'n gysylltiedig ag alcohol a throseddau eraill.

Mae Heddlu De Cymru yn atgoffa pawb i roi gwybod am bryderon ymddygiad gwrthgymdeithasol fel rhan o'i ymgyrch Adrodd i Adfer y gaeaf hwn. Mae adrodd am faterion yn galluogi’r heddlu i gymryd camau priodol, boed hynny drwy drefnu gweithgareddau dargyfeiriol addas, addysgu’r cyhoedd, cynyddu adnoddau mewn ardal neu gymryd camau gorfodi mwy uniongyrchol.

Bydd Hysbysiadau Gwarchod y Gymuned (CPNs) yn cael eu cyflwyno i ad-gyflawnwyr ymddygiad gwrthgymdeithasol, lle gellir dangos bod eu hymddygiad wedi cael effaith andwyol ar ansawdd bywyd y rhai yn y gymuned, ei fod o natur barhaus, a'i fod yn afresymol.

Mae camau gweithredu eraill sydd wedi’u targedu y gaeaf hwn yn cynnwys:

• Tîm Ymgysylltu Stryd Caerdydd yn mynd i'r afael â chysgu ar y stryd, digartrefedd ehangach, a'i faterion cysylltiedig megis cardota ar y stryd a chamddefnyddio cyffuriau ac alcohol trwy ddargyfeirio unigolion i wasanaethau tai, camddefnyddio sylweddau ac iechyd meddwl.
• Ymgyrch Adfent Abertawe, Castell-nedd a Phort Talbot yn codi ymwybyddiaeth o ddwyn o siopau yng Nghanolfan Siopa Fforestfach a chynyddu patrolau sydd wedi eu targedu yn ystod oriau agor.
• Sioe Deithiol Atal Troseddu yn Llwynypia, Rhondda Cynon Taf, yn darparu cyngor i siopwyr er mwyn diogelu yr hyn maent wedi ei brynu rhag lladron posibl.

Mae Rhingyll James Ponting o Heddlu De Cymru yn cydlynu presenoldeb yr heddlu o amgylch Stryd y Gwynt, Abertawe, gyda phresenoldeb cynyddol yr heddlu mewn lifrai bob nos Fercher, nos Wener a nos Sadwrn tan Nos Galan.

Bydd swyddogion heddlu arbenigol hefyd yn patrolio canol dinas Abertawe mewn dillad plaen i dawelu meddyliau tyrfaoedd y Nadolig trwy fonitro unrhyw un sy'n arddangos ymddygiad sy’n achosi pryder i fenywod, ac yna’n cymryd camau i ymyrryd.

“Mae cyfnod y Nadolig a’r Flwyddyn Newydd yn brysur yng nghanol ein trefi a’n dinasoedd wrth i bobl fwynhau diod haeddiannol gyda ffrindiau, cydweithwyr a theulu,” meddai Rhingyll Ponting.

“Ond mae rhai pobl yn mynd â phethau’n rhy bell ac yn ymddwyn mewn ffordd sy’n cael effaith andwyol amlwg ar ein cymunedau, nid yn unig yn effeithio ar y rhai sy’n mwynhau noson allan ond hefyd ar y rhai sy’n gweithio yn y sector lletygarwch neu’r gwasanaethau brys.

“Rydym am anfon neges glir na fydd trosedd nac ymddygiad gwrthgymdeithasol yn cael eu goddef.

“Fel rhan o Brosiect Adrodd i Adfer, hoffem atgoffa pawb i adrodd eu pryderon ynghylch ymddygiad gwrthgymdeithasol ar-lein, drwy 101, neu drwy ffonio 999 mewn argyfwng. Mae pob adroddiad o bwys ac yn cynorthwyo’r heddlu i fynd i’r afael â materion yn y modd mwyaf priodol.”