Achub 100 o fywydau gyda naloxone trwynol

Mae swyddogion a PCSOs Heddlu De Cymru wedi defnyddio naloxone trwynol i achub bywyd am y canfed tro.

Defnyddir y gwrthgyffur brys mewn achosion o orddos a achoswyd gan heroin ac opiadau neu sylweddau opioid eraill ac mae tua 700 o swyddogion yr heddlu, PCSOs a Chwnstabliaid Gwirfoddol yn ei gario.

Yr wythnos hon, cofnodwyd y canfed achos cadarnhaol o'i ddefnyddio, ychydig dros ddwy flynedd ers i brif swyddogion ganiatáu i swyddogion rheng flaen ei gario.

O blith y 100 o achosion cadarnhaol o'i ddefnyddio, mae 36 wedi bod yn Abertawe a Chastell-nedd Port Talbot, 32 ym Morgannwg Canol, a 32 yng Nghaerdydd a'r Fro.

Mae nifer y cyflogeion sy'n gwirfoddoli i'w gario hefyd wedi parhau i dyfu ers iddo gael ei gyflwyno.

Dywedodd y Ditectif Brif Arolygydd Stuart Johnson, swyddog arweiniol ar gyfer naloxone:

“Mae Heddlu De Cymru yn arwain y ffordd o ran y defnydd o naloxone trwynol ac mae hyn yn rhywbeth y dylem fod yn falch ohono.

“Nid yw cyffuriau yn gwahaniaethu, ac rydym wedi llwyddo i helpu i achub bywydau 100 o bobl, sydd wedi gallu dychwelyd adref at eu teuluoedd a'u ffrindiau.”

Mae naloxone yn gweithio drwy wrthdroi'r trafferthion anadlu y gall gorddos o'r sylweddau hyn eu hachosi, gan roi mwy o amser i ofal meddygol brys gyrraedd.

Ychwanegodd y Ditectif Brif Arolygydd Johnson:

“Yn anffodus, mae nifer yr achosion o wenwyno sy'n gysylltiedig â chyffuriau yn parhau i fod yn uchel yn Ne Cymru ac mae heriau newydd yn dod i'r amlwg yn rheolaidd; opioidau synthetig yw'r her ddiweddaraf.

“Dim ond un ymysg llawer o ymyriadau sydd eu hangen i leihau nifer y marwolaethau sy'n gysylltiedig â chyffuriau yw naloxone trwynol. Rydym yn parhau i weithio gydag asiantaethau partner i leihau achosion o wenwyno sy'n gysylltiedig â chyffuriau."