Ymgyrch mis Gorffennaf yn chwalu llinellau cyffuriau ledled Caerdydd

Mae ymgyrch gan y Tîm Troseddau Cyfundrefnol i fynd i'r afael â chyflenwyr llinellau cyffuriau yng Nghaerdydd wedi bod yn llwyddiant.

Ers dechrau mis Gorffennaf, cafodd gwarantau o dan y Ddeddf Camddefnyddio Cyffuriau eu gweithredu ledled dinas Caerdydd, gan arwain at y canlynol:

• 25 o arestiadau
• atafaelu £17,000 mewn arian parod
• atafaelu chwarter cilogram o grac cocên
• atafaelu 300 o ddeliadau stryd o grac a heroin
• atafaelu 21 o linellau cyffuriau

Dywedodd y Ditectif Arolygydd Tim Jones:

“Rydym wedi gweithredu ar gudd-wybodaeth rydym wedi bod yn ei datblygu ers peth amser ac wedi llwyddo i chwalu busnes 21 o linellau cyffuriau ers dechrau'r mis. Mae ditectifs bellach yn gweithio'n galed i garcharu pawb sy'n ymwneud â gweithrediadau llinellau cyffuriau. O'r 25 o bobl a arestiwyd, mae 17 ohonynt eisoes wedi cael eu cyhuddo o droseddau sy'n ymwneud â chyffuriau. Mae chwech o'r rheini wedi pledio'n euog yn gynnar a byddant yn cael eu dedfrydu fis nesaf. Mae ein gweithredoedd mis yma wedi tynnu sawl deliwr cyffuriau oddi ar strydoedd Caerdydd.”

Llinellau cyffuriau yw'r term a ddefnyddir i ddisgrifio achos o ddelio mewn cyffuriau lle caiff ffonau symudol eu defnyddio i gyflenwi cyffuriau o ddinasoedd mawr i drefi ac ardaloedd gwledig. Caiff llinellau cyffuriau eu rhedeg gan 'Ddalwyr Llinellau' ac mae'r rhedwyr, sy'n aml yn bobl agored i niwed, yn dosbarthu'r cyffuriau. Mae'r system o ddosbarthu cyffuriau yn arwain at drais difrifol a chamfanteisio

Mae nifer helaeth o'r rhai a arestiwyd wedi cael eu cyhuddo ac eisoes wedi pledio'n euog yn y llys – byddant yn cael eu dedfrydu fis nesaf.

Mae gan Heddlu De Cymru ddull gweithredu dim goddefgarwch at ddelio mewn cyffuriau, a dim ond un enghraifft yw'r achos hwn o'r ffordd rydym yn mynd i'r afael ag achosion o ddelio mewn cyffuriau yn y gymuned.

Gallwn weithredu ar y wybodaeth a gawn gan y cyhoedd, ac rydym yn gwneud hynny'n rheolaidd, felly parhewch i gysylltu â ni.

Anogir unrhyw un sydd ag amheuon neu wybodaeth am achosion o ddelio mewn cyffuriau anghyfreithlon i gysylltu â ni.

• Sgwrs Fyw https://www.south-wales.police.uk/cy-GB/
• Rhoi gwybod ar-lein https://www.south-wales.police.uk/cy-GB/riportio/riportio
• 101 neu Crimestoppers yn ddienw ar 0800 555 111
• Ffoniwch 999 bob amser mewn argyfwng.