Mae dyn o Gaerdydd a gyfnerthodd ddrws ei fflat a gosod gamera teledu cylch cyfyng cyfrinachol wedi cael ei garcharu am ymwneud â chyflenwi cyffuriau

 

Cafodd Richard Sullivan ei arestio gan swyddogion mewn dillad plaen oedd ar batrôl yn Nhrelái, Caerdydd.

Roedd y swyddogion yn amau eu bod wedi gweld dêl cyffuriau ger Gough Road rhwng dyn ar feic a theithwyr mewn car.

Cafodd y car ei stopio ar Wheatley Road a gwelwyd bod gan deithwyr y car swm o heroin.

Gwelwyd y beiciwr yn mynd i mewn i floc o fflatiau ar Ogmore Road, Caerau ac yna'n gadael. Cafodd Sullivan, 44 oed ei arestio a datgelodd chwiliad o'i fflat dystiolaeth glir bod yr eiddo yn cael ei ddefnyddio i baratoi crac cocên. Atafaelwyd arian parod ac arfau hefyd.

Nodwyd bod drws ffrynt y fflat wedi'i gyfnerthu'n helaeth gyda gwialenni dur a bracedi metel, ac roedd sawl camera teledu cylch cyfyng, yr oedd rhai ohonynt wedi'u cuddio.

Plediodd Sullivan yn euog i ymwneud â chyflenwi cyffuriau a chafodd ei ddedfrydu i 42 mis yn y carchar yn Llys y Goron Caerdydd, ddydd Gwener 12 Gorffennaf.

 

 

Dywedodd PC Daniel Davies o Heddlu De Cymru:

"Nid oes rheswm arall dros gyfnerthu eiddo heblaw bod gweithgarwch anghyfreithlon yn mynd rhagddo yno.
"Roedd Sullivan wedi mynd i gryn ymdrech i addasu'r fflat yr oedd yn ei rentu at ddiben atal yr heddlu rhag mynd i mewn. Mae hyd yn oed wedi gosod camerâu diogelwch ar flaen ac ôl y tŷ a hyd yn oed wedi gosod camerâu ysbïo ym mhibellau dŵr coridor cymunedol y bloc o fflatiau. Ni fyddech byth wedi sylwi bod y camerâu yno oni bai eich bod wedi gweld y teledu cylch cyfyng ar y monitor yn y fflat. Rhoddwyd gwybod am hyn i Gyngor Caerdydd."

Mae gan Heddlu De Cymru ddull gweithredu dim goddefgarwch mewn perthynas â delio mewn cyffuriau, a dim ond un enghraifft yw'r gwaith rydym yn ei gyflawni.

Ni fyddwn yn goddef cyffuriau yn ein cymunedau, ac rydym yn targedu'r rhai y credir eu bod yn ymwneud â chyflenwi cyffuriau a reolir yn barhaus.

Gallwn weithredu ar y wybodaeth a gawn gan y cyhoedd, ac rydym yn gwneud hynny'n rheolaidd, felly parhewch i gysylltu a gweithio â ni.

• Sgwrs Fyw https://www.south-wales.police.uk/
• Rhoi gwybod ar-lein https://www.south-wales.police.uk/cy-GB/riportio/riportio/
• 101 neu Crimestoppers yn ddienw ar 0800 555 111

Ffoniwch 999 bob amser mewn argyfwng.