Dyn o Gaerdydd a wariodd £170k ar gocên wedi'i garcharu.

Gwariodd Marcell Bridgeman £170k ar chwe cilo o gocên, ond daeth ei drefniadau cyflenwi cyffuriau i ben pan gynhaliwyd chwiliad dan warant yn y Tyllgoed, Caerdydd.
Ceisiodd gael gwared ar ei ffonau symudol, a oedd yn cynnwys tystiolaeth allweddol, drwy eu taflu o ffenestr llawr cyntaf ei dŷ pan dorrodd swyddogion i mewn.
Arestiwyd Bridgeman yn ei ystafell wely, daethpwyd o hyd i'w ffonau ac atafaelwyd yr eitemau canlynol o'i dŷ:

* £11.5k mewn arian parod
* Canabis oedd â gwerth rhwng £5,900 a £11,780.

Dillad ac ategolion cynllunydd, gan gynnwys pedwar pâr o esgidiau Valentino, tri bag Louis Vuitton a dau bâr o esgidiau Balenciaga.
Ar ôl i swyddogion gael gafael ar ffonau symudol Bridgeman o'i ardd, gwelwyd ei fod wedi gwario £170k ar chwe cilo o gocên a'i fod wedi'i werthu er mwyn elwa'n ariannol.
Yn ystod ei gyfweliad, atebodd y dyn 23 oed bob cwestiwn gyda "dim sylw", ond yn ddiweddarach, plediodd yn euog i fod â chocên yn ei feddiant gyda'r bwriad o'i gyflenwi a bod â chanabis yn ei feddiant gyda'r bwriad o'i gyflenwi.
Arestiwyd Bridgeman ar 5 Rhagfyr 2023, ac ar 21 Mehefin 2024, cafodd ei ddedfrydu yn Llys y Goron Caerdydd i 7 mlynedd a 4 mis yn y carchar.
Dywedodd y Ditectif Ringyll, Dominic Belotti, o Heddlu De Cymru: “Mae gan Heddlu De Cymru ddull gweithredu dim goddefgarwch mewn perthynas â delio mewn cyffuriau, a dim ond un enghraifft yw'r gwaith rydym yn ei gyflawni.
“Ni fyddwn yn goddef cyffuriau yn ein cymunedau, ac rydym yn targedu'r rhai y credir eu bod yn ymwneud â chyflenwi cyffuriau a reolir yn barhaus.
“Gallwn weithredu ar y wybodaeth a gawn gan y cyhoedd, ac rydym yn gwneud hynny'n rheolaidd, felly parhewch i gysylltu a gweithio â ni.”

🗪 Sgwrs Fyw https://www.south-wales.police.uk/cy-GB/

💻 Rhowch Wybod Ar-lein https://www.south-wales.police.uk/cy-GB/riportio/riportio

📞 101 neu Crimestoppers yn ddienw ar 0800 555 111.

 Ffoniwch 999 bob amser mewn argyfwng.