Tri dyn o Abertawe wedi'u carcharu am gyflenwi cyffuriau

Mae tri dyn o Abertawe wedi cael eu carcharu am ymgymryd â gweithgarwch cyffuriau anghyfreithlon.

Cafodd Benjamin Simons, sy'n 31 oed ac o Bortmead, a Leon Simons sy'n 33 oed ac o Flaenymaes, eu harestio ar ôl i bedwar gwarant Adran 8 gael eu cyflawni, lle cafodd symiau enfawr o gocên – 1.7kg – yn ogystal ag arian parod – eu hatafaelu. Daethpwyd o hyd i glorian ar gyfer pwyso cyffuriau yn ogystal â chyllell fawr yn ystod y gwarantau.

Canfuwyd bod uned yn Fforestfach a oedd yn cael ei defnyddio gan y brodyr yn cynnwys eitemau fel peiriant hydrolig cocên, jet-sgi, a beiciau cwad.

Cafodd Leon a Benjamin Simons eu dedfrydu i chwe blynedd yn y carchar yn Llys y Goron Abertawe.

Yn ystod un o'r gwarantau, daethpwyd hefyd o hyd i Callum Regan, 25 oed o'r Hafod – brawd Benjamin a Leon Simons. Daethpwyd o hyd i ffôn Regan a oedd yn cynnwys tystiolaeth o'i gyfraniad yn cyflenwi cyffuriau.

Mae Regan hefyd wedi cael ei ddedfrydu i chwe blynedd yn y carchar.

Dywedodd y Ditectif Ringyll Thomas Richardson:

"Mae'r dedfrydau diweddar hyn yn profi nad yw'n werth delio mewn cyffuriau, ac na chaiff gweithgarwch o'r math hwn ei oddef yn ein cymunedau.

"Cyflawnodd Benjamin a Leon Simons a Callum Regan eu hymgyrch gyffuriau heb feddwl ddwywaith am ddiogelwch a llesiant eraill – gan gynnwys aelodau o'u teulu eu hunain.

"Byddant nawr yn haeddiannol yn dechrau ar ddedfryd hir yn y carchar, a bydd ein cymunedau'n fwy diogel o ganlyniad i hynny."