Dyn o Gastell-nedd Port Talbot wedi'i garcharu am achosion mynych o stelcio ac aflonyddu
Cynnwys y prif erthygl
Mae dyn o Gastell-nedd Port Talbot wedi cael ei garcharu yn dilyn euogfarn am sawl achos o stelcio ac aflonyddu.
Cafodd Neal Hancock, 38 oed o Sandfields, orchymyn atal yn flaenorol er mwyn ei atal rhag cysylltu â'i ddioddefwyr, ond torrodd y gorchymyn hwn. O ganlyniad, mae bellach wedi cael ei ddedfrydu i 46 wythnos yn y carchar.
Dywedodd yr Arolygydd Jared Easton:
“Mae Neal Hancock yn droseddwr stelcio cyfresol sydd wedi peri trallod i sawl dioddefwr drwy ei ymddygiad annerbyniol.
"Dangosodd obsesiwn â'i ddioddefwyr, gan wneud iddynt ofni am eu diogelwch."
Mae stelcio ac aflonyddu yn droseddau o dan Ddeddf Gwarchodaeth rhag Aflonyddu 1997.
Gallai rhywun sydd yn eich adnabod fod yn eich stelcio; cyn-bartner neu hen ffrind, neu gall fod yn ddieithryn. Os bydd yn rhywun rydych yn ei adnabod, neu roeddech yn arfer ei adnabod, nid yw hynny'n golygu mai chi sydd ar fai; caiff ei ystyried fel stelcio o hyd ac mae'n drosedd.
Os yw ymddygiad yr unigolyn yn obsesiynol, yn ddigroeso a/neu'n fynych, gallwch roi gwybod am y drosedd neu gallwch gysylltu â'r Llinell Gymorth Stelcio Genedlaethol am ragor o gyngor.
Ceir gwybodaeth yma am gymorth i ddioddefwyr stelcio ac aflonyddu: Cymorth i ddioddefwyr stelcio ac aflonyddu | Heddlu De Cymru (south-wales.police.uk)