Heddlu De Cymru: Ymrwymiad parhaus i ymgyrch i fynd i'r afael â throseddau cyllyll

Mae ymgyrch #DdimYrUn yn defnyddio dull ymyrryd yn gynnar o atal troseddau cyllyll, gan gefnogi oedolion y gellir ymddiried ynddynt, yn cynnwys rhieni, athrawon, swyddogion yr heddlu a gweithwyr ieuenctid, i addysgu plant a phobl ifanc 11-16 oed am beryglon a chanlyniadau cario cyllell.

Mae Heddlu De Cymru a Chomisiynydd yr Heddlu a Throseddu, mewn partneriaeth ag Uned Atal Trais Cymru, yn parhau â'i ymrwymiad i fynd i'r afael â throseddau cyllyll yn ein cymunedau.

Lansiwyd ail gam yr ymgyrch heddiw (12 Ebrill), gydag adnoddau ychwanegol i gefnogi sgyrsiau â phlant a phobl ifanc am droseddau cyllyll.

Datblygwyd yr adnoddau hyn yn dilyn gweithdai ac arolygon gyda phlant, pobl ifanc a gweithwyr proffesiynol sydd wedi defnyddio'r ymgyrch.

Mae'r adnoddau newydd yn cynnwys y canlynol:

• Ffilm fer wedi'i chreu gan ysgrifenwyr ifanc o Brifysgol Metropolitan Caerdydd ac wedi'i datblygu a'i chynhyrchu gan ddau ysgrifennydd lleol;
• Cyfweliad â gweithiwr ieuenctid fel rhan o gyfres ‘In Conversation’, i roi cyngor ymarferol i rieni/gofalwyr, gweithwyr proffesiynol a phobl ifanc sy'n poeni am droseddau cyllyll neu'n ystyried cario cyllell;
• Cynnwys newydd ar gyfer y wefan;
• Adnoddau addysgol diwygiedig sy'n adlewyrchu'r Cwricwlwm newydd i Gymru er mwyn helpu staff addysgol i gynnal sgyrsiau â phobl ifanc am droseddau cyllyll.

Mae troseddau cyllyll yn dal i fod yn brin yn ne Cymru; dim ond 0.3% o blant a phobl ifanc 10-29 oed sy'n cario cyllell*. Mae data diweddar gan Uned Atal Trais Cymru a'i phartneriaid yn dangos bod nifer y bobl ifanc dan 25 oed sy'n cael eu derbyn i'r ysbyty yn ne Cymru o ganlyniad i anaf yn gysylltiedig ag ymosodiad wedi lleihau 157% dros y pum mlynedd diwethaf**, a bod 53% yn llai o bobl ifanc (dan 25 oed) wedi cael eu derbyn i'r ysbyty o ganlyniad i anaf a achoswyd gan gyllell rhwng mis Hydref 2022 a mis Medi 2023 o gymharu â'r cyfnod o 12 mis blaenorol***.

Dywedodd yr Uwch-arolygydd Esyr Jones, Heddlu De Cymru:

“Mae'r adnoddau hyn wedi'u datblygu yn dilyn gweithdai ac arolygon gyda phlant, pobl ifanc a gweithwyr proffesiynol sydd wedi defnyddio'r ymgyrch.

“Mae wedi bod yn wych gweld cynifer o bobl yn ymgysylltu â ni ers 2022, a gwyddom, fod addysg ac ymyrryd yn gynnar yn allweddol i atal troseddau cyllyll yn ne Cymru.

“Dylai pobl ifanc allu teimlo'n ddiogel yn ein cymunedau, a mwynhau plentyndod heb ofn cyllyll.  Mae ein cymunedau wedi chwarae rhan hanfodol i'n helpu i gyflwyno’r ymgyrch hon. Po fwyaf o bobl ifanc y gallwn eu haddysgu am beryglon troseddau cyllyll, y mwyaf y gallwn weithio tuag at ddyfodol heb gyllyll.”

Dywedodd Dan Jones, Pennaeth Uned Atal Trais Cymru:

“Mae plant a phobl ifanc wedi dweud wrthym mai'r prif reswm pam mae rhywun yn cario cyllell yw am ei fod yn meddwl y bydd yn ei gadw'n ddiogel. Mewn gwirionedd, y gwrthwyneb sy'n wir. Rydych yn llawer mwy tebygol o gael niwed gan gyllell – naill ai eich un chi neu un rhywun arall – os byddwch yn cario cyllell eich hun.

“Fel rhan o'r ymgyrch hon, rydym wedi gwrando ar blant, pobl ifanc a gweithwyr proffesiynol, ac wedi datblygu adnoddau sy'n canolbwyntio ar yr atebion i droseddau cyllyll a awgrymwyd gan blant a phobl ifanc. Diolch i'r drefn, mae troseddau cyllyll yn brin yn ne Cymru, ond mae un achos yn un yn ormod, a thrwy weithio gyda gweithwyr proffesiynol, plant a phobl ifanc, rwy'n ffyddiog y gallwn leihau nifer y troseddau cyllyll ymhellach.”