Diwrnod Stephen Lawrence 2024: Ymuno â'n disgyblion SPARK i wneud ein haddewidion ar gyfer newid

Cyn Diwrnod Stephen Lawrence2024, gwnaethom ymweld â'n carfan SPARK yn Ysgol Uwchradd Gymunedol Gorllewin Caerdydd er mwyn iddynt rannu ein #YmrwymiadauDiwrnodStephenLawrence.

Nod prosiect SPARK yw helpu i feithrin cydberthnasau gwell rhwng y bobl ifanc yn ein cymunedau a'r heddlu.

Mae prosiect SPARK, a gaiff ei redeg gan Gymdeithas Heddlu Du Heddlu De Cymru, wedi rhoi cyfleoedd i fyfyrwyr siarad ag aelodau gwahanol o'r heddlu, yn ogystal â chymryd rhan mewn gweithdy arwain ac ymweld â'n pencadlys. Mae'r Gymdeithas Heddlu Du hefyd wedi bod yn gweithio'n agos gyda sefydliadau eraill, fel Undeb Rygbi Cymru, i roi cyfleoedd i'r plant.

Nod y prosiect hwn eleni yw ysbrydoli newid cymdeithasol drwy rymuso'r genhedlaeth nesaf, felly roedd ein digwyddiad i nodi Diwrnod blynyddol Stephen Lawrence yn addas iawn gan fod Sefydliad Stephen Lawrence yn canolbwyntio ar y pŵer o ddysgu, gan weithio i rymuso meddyliau a llywio'r dyfodol.

Wrth weithio gyda'r myfyrwyr, gwnaethom eu hannog i fod yn greadigol er mwyn creu fideo ar gyfer Diwrnod Stephen Lawrence, gan eu galluogi i fynegi'r hyn y mae cydraddoldeb yn ei olygu iddynt a'r hyn y byddent yn ymrwymo iddo eleni.

Dywedodd Sunita Sood, Cadeirydd BPA Heddlu De Cymru:

“Menter i ymgysylltu â phobl ifanc a gaiff ei harwain gan Gymdeithas Heddlu Du Heddlu De Cymru, yw rhaglen SPARK, ar y cyd ag elusennau fel The Gloves Are On a Race Council Cymru. Mae'n cynnig mewnbwn i'r adrannau amrywiol yn Heddlu De Cymru, ac rydym yn rhoi cyngor ar faterion fel ymlid traffig, y defnydd gorau o alwadau 999 / 101, cyngor ac arweiniad ar droseddau cyllyll a digwyddiadau sy'n gysylltiedig ag arfau tanio.

“Rydym yn gweithio gyda myfyrwyr yn ein cymunedau i ddatblygu sgiliau arwain, gan feithrin cydberthnasau cadarnhaol rhwng ein pobl ifanc a'r heddlu. Rydym yn cynnig cyfleoedd i arweinwyr ifanc y dyfodol ddatblygu drwy eu cyflwyno i sefydliadau amrywiol. Mae'r rhaglen yn sicrhau bod cyfranogwyr yn cael eu grymuso i edrych y tu hwnt i sefyllfaoedd, i anelu'n uchel, i ddyheu ac i lwyddo mewn bywyd.

“Mae grymuso ein pobl ifanc heddiw yn creu arweinwyr y dyfodol, ac ar y cyd â rhaglenni fel SPARK, rydym yn tanio potensial, yn adeiladu pontydd ac yn llywio dyfodol sy'n llawn cyfleoedd a dealltwriaeth.”

“Diolch i Soraya ac Ysgol Uwchradd Gymunedol Gorllewin Caerdydd am roi'r cyfle i ni roi prosiect SPARK ar waith.”

Sefydlodd Soraya Kelly The Gloves Are On, elusen sydd â'r nod o godi ymwybyddiaeth o'r materion sy'n effeithio ar blant, pobl ifanc ac oedolion ac mae hefyd yn gweithio yn Ysgol Uwchradd Gymunedol Gorllewin Caerdydd.

Dywedodd:

“O ganlyniad uniongyrchol i brosiect SPARK gyda Heddlu De Cymru, mae'r myfyrwyr wedi cael budd o ymgysylltu ymhellach â'r heddlu, ac mae Swyddfa Annibynnol Ymddygiad yr Heddlu wedi dechrau sgyrsiau er mwyn trafod eu hawliau ac wedi eu gwahodd i ymuno â'r rhaglen i bobl ifanc.

“Mae Undeb Rygbi Cymru wedi bod yn yr ysgol yn siarad â'r plant yn ogystal â mynd â nhw ar ymweliadau a darparu cit chwaraeon, nwyddau a thocynnau i fynd i wylio gemau.

“Mae sefydliadau eraill hefyd wedi ymweld â'r ysgol, fel Caerdav, a drefnodd i'r myfyrwyr ymweld â'i gyfleusterau a thrafod cyfleoedd lleoliad gwaith.

“Diolch i bob un o'r myfyrwyr am gymryd rhan ac i'r Prif Gwnstabl Cynorthwyol Danny Richards a'r Uwch-arolygydd Marc Attwell am eu cymorth parhaus ac am drefnu i swyddogion fynychu'r ysgol yn rheolaidd er mwyn dechrau meithrin cydberthnasau cadarnhaol â phobl ifanc yr ardal.

“Ni fyddai'r cyfleoedd hyn wedi bod yn bosibl heb gymorth gan brosiect SPARK a Heddlu De Cymru.”