Carcharu gang troseddol am gyfanswm o 45 mlynedd

Mae pedwar dyn wedi cael eu hanfon i'r carchar am gyfanswm o 45 mlynedd ar ôl eu cael yn euog o ladrata o dŷ yn ardal Llaneirwg yng Nghaerdydd ym mis Mehefin 2023.

Ar 14 Mehefin y llynedd, teithiodd y pedwar dyn a bachgen 17 oed i Gaerdydd mewn dau gerbyd hurio gyda rhifau cofrestru a oedd wedi cael eu newid.

Torrodd Charlie Seeney a Thomas Hagans i mewn i'r cyfeiriad, a gwnaethant ddwyn coffor a oedd wedi'i guddio y tu mewn.

Roedd Simon Seeney – tad Charlie – a Ras Thomas hefyd yn bresennol gyda'r ddau gerbyd.

Llwyddodd ditectifs a oedd yn ymchwilio i'r fwrgleriaeth i adnabod y cerbydau hurio, a'u tracio wrth iddynt deithio o Taunton ar yr un diwrnod.

Nid oedd y swyddogion yn gwybod ar y pryd, ond roedd y gang newydd gyflawni bwrgleriaeth waethygedig yn Taunton lle gwnaethant dorri i mewn i gyfeiriad gyda throsolion a thwceiod, a gorfodi'r deiliaid i orwedd â'u hwynebau i lawr.  Ymosodwyd ar y deliaid hefyd. Gwnaethant ffoi â gwerth tua £50,000 o emwaith o'r cyfeiriad hwn.

Drwy ddefnyddio deunydd Teledu Cylch Cyfyng, roedd modd i'r swyddogion data ffôn symudol a thechnoleg tracio cerbydau adnabod y rhai dan amheuaeth yn gynnar, gan eu holrhain i gyfeiriadau yn Birmingham, Bryste a Chaerdydd.

Plediodd Charlie Seeney (18 oed) a Simon Seeney (42 oed), y ddau o Birmingham, yn euog i fwrgleriaeth, bwrgleriaeth waethygedig ac ymosodiad cyn i'r treial ddechrau.

Ddydd Mercher 21 Chwefror, ar ôl treial, cafwyd Thomas Hagans (41 oed) o Birmingham, Ras Thomas (41 oed) o Gaerdydd a Craig Shaw (34 oed) o Birmingham yn euog gan y rheithgor.

• Cafodd Ras Thomas ddedfryd o 13 mlynedd yn y carchar
• Cafodd Thomas Hagans ddedfryd o 13 mlynedd yn y carchar
• Cafodd Craig Shaw ddedfryd o 10 mlynedd yn y carchar
• Cafodd Simon Seeney ddedfryd o 9 mlynedd yn y carchar

Mae Charlie Seeney bellach yn 18 oed ond roedd yn 17 ar adeg ei ddedfryd. Ymdriniwyd ag ef yn Llys Ieuenctid Birmingham a chafodd atgyfeiriad ieuenctid o 12 mis.

Dywedodd y Ditectif Gwnstabl Rhys Perrett:

"Hoffwn dalu teyrnged i ddioddefwyr y ddwy drosedd am eu dewrder drwy gydol yr ymchwiliad.

"Roedd hwn yn ymchwiliad cymhleth lle bu Heddlu De Cymru, Cwnstabliaeth Avon a Gwlad yr Haf a Gwasanaeth Erlyn y Goron yn cydweithio i sicrhau'r pledion euog a'r euogfarnau a welsom yn y Llys.

"Mae'r dedfrydau a roddwyd yn Llys y Goron Casnewydd yn adlewyrchu difrifoldeb y troseddau a gyflawnwyd gan y dynion hyn. Bydd yr unigolion peryglus hyn nawr yn y carchar am amser hir."

"Mae ymdrechion Heddlu De Cymru ar y cyd â'n cydweithwyr yn Avon a Gwlad yr Haf yn dangos ein hymrwymiad at gadw ein cymunedau yn ddiogel drwy dynnu troseddwyr peryglus fel y rhain oddi ar ein strydoedd am amser hir."