Dyn wedi'i garcharu am ymosod a bod â chyffuriau Dosbarth A a chyllyll yn ei feddiant

 

Mae dyn o Gaerdydd wedi cael ei ddedfrydu i 40 mis yn y carchar am fod â chyffuriau Dosbarth A yn ei feddiant gyda'r bwriad o'u cyflenwi, ymosod, a bod ag eitem lafnog yn ei feddiant mewn man cyhoeddus.

Cafodd David McCauley, 19 oed o Hiles Road, Trelái, ei ganfod â chyllell sombi fawr (yn y llun) yn ei feddiant, sydd wedi cael ei hatafaelu. Plediodd yn euog ym mis Mawrth eleni.

Dywedodd Cwnstabl yr Heddlu Jon Grenville-Roberts:

"Mae'r euogfarn hon yn deillio o waith da gan Gwnstabl yr Heddlu Clarke o dîm ymateb Trelái.

"Mae hyd yn oed un drosedd cyllyll yn un yn ormod, ac mae mynd i'r afael â'r niwed a achosir gan droseddau cyllyll yn un o brif flaenoriaethau Heddlu De Cymru.

"Fodd bynnag, rydym hefyd yn benderfynol o fynd i'r afael ag achosion sylfaenol troseddau cyllyll, ac rydym yn gweithio'n agos gydag Uned Atal Trais Cymru a phartneriaid eraill – gan gynnwys gwasanaethau addysg a safonau masnach – fel rhan o ddull iechyd y cyhoedd o ymdrin â phroblem troseddau cyllyll, er mwyn atal pobl rhag cario cyllyll yn y lle cyntaf."

Os ydych yn amau bod rhywun yn cario cyllell, neu'n ymwneud â chyffuriau, gallwch gysylltu â'r heddlu ar 101, neu Crimestoppers yn ddienw ar 0800 555111.