Protest ym Mae Caerdydd – Diweddariad

Mae protest a gynlluniwyd ymlaen llaw ym Mae Caerdydd wedi dod i ben yn heddychlon heb darfu llawer ar y cyhoedd.
Roedd ymgyrch blismona ar waith drwy gydol y brotest a ddenodd tua 3,000 o bobl y tu allan i'r Senedd.
Darparwyd llwybr wedi'i gymeradwyo i'r cyfranogwyr a oedd yn gyrru cerbydau amaethyddol, ynghyd ag ardal parcio ac aros ddynodedig ar yr A4232 Ffordd Gyswllt Dwyrain y Bae.
Cafodd hyn ei hwyluso gan orchymyn o dan Adrannau 12 a 14 o Ddeddf Trefn Gyhoeddus 1986.
Gwnaed y penderfyniad hwn er mwyn hwyluso dymuniadau'r protestwyr i gynnal protest heddychlon, gan gydbwyso diogelwch y cyhoedd ehangach.
Ailagorwyd y ffordd tua 3pm.
Dywedodd yr Uwch-arolygydd Esyr Jones: “Mae Heddlu De Cymru yn parchu'r hawl i brotestio'n heddychlon, ac yn dilyn trafodaeth â'r trefnwyr, bu modd i ni sicrhau bod y brotest yn cael ei chynnal yn ddiogel ac yn gyfreithlon, gan darfu cyn lleied â phosibl ar y cyhoedd ehangach.
"Mae dod â thractorau a cherbydau amaethyddol eraill i amgylchedd dinas brysur yn peri risg i ddiogelwch defnyddwyr ffyrdd eraill, a gallai gyfyngu ar symudiad y gwasanaethau brys.
"Fodd bynnag, drwy weithio gyda threfnwyr y brotest a Chyngor Caerdydd, cafodd ardal aros addas ei nodi gan olygu nad oedd fawr ddim tarfu nac oedi ar y llwybrau o amgylch Bae Caerdydd nac ar draws rhwydwaith ffyrdd ehangach De Cymru."