Plismona protest ym Mae Caerdydd – 28 Chwefror

Mae Heddlu De Cymru yn ymwybodol o brotest y bwriedir ei chynnal ym Mae Caerdydd ddydd Mercher, 28 Chwefror.

Disgwylir i'r brotest, sy'n dechrau am 12.30pm, ddenu niferoedd mawr a gall hefyd achosi traffig araf ar y ffyrdd i Fae Caerdydd ac ar draws rhwydwaith ffyrdd ehangach De Cymru.

Nid yw maint yr oedi i ddefnyddwyr ffyrdd eraill yn glir ar hyn o bryd, ond fel heddlu, rydym yn monitro'r sefyllfa yn agos.

Bydd ymgyrch blismona ar waith yn ystod y brotest a byddwn yn mynd ati i leihau'r tarfu ar y cyhoedd lle bynnag y bo'n bosibl. Nid oes cynlluniau i gau ffyrdd ond bydd mynediad i rai ffyrdd o amgylch y Senedd yn cael ei reoli.

Dywedodd yr Uwch-arolygydd Esyr Jones: “Mae Heddlu De Cymru yn parchu'r hawl i brotestio'n heddychlon ac rydym wrthi'n trafod â'r trefnwyr er mwyn sicrhau bod y brotest yn cael ei chynnal yn ddiogel ac yn gyfreithlon, gan darfu cyn lleied â phosibl ar y cyhoedd ehangach.

“Er bod cytundeb i hwyluso'r brotest y tu allan i'r Senedd, byddwn yn annog protestwyr i beidio â dod â thractorau nac unrhyw gerbydau amaethyddol i'r brotest. Mae pryderon eu bod yn peri risg i ddiogelwch defnyddwyr ffyrdd eraill ac yn cyfyngu ar symudiad gwasanaethau brys mewn amgylchedd dinas prysur.

“Byddwn yn monitro'r sefyllfa drwy'r dydd a dylai modurwyr gadw llygad am wybodaeth am unrhyw darfu ar y rhwydwaith ffyrdd a chynllunio eu teithiau yn unol â hynny. Byddwn yn rhoi gwybod i'r cyhoedd am unrhyw oedi neu darfu drwy gydol y dydd.”