Diwrnod Rhyngwladol Menywod a Merched mewn Gwyddoniaeth 2024

Mae Diwrnod Rhyngwladol Menywod a Merched mewn Gwyddoniaeth yn gyfle i ni ddathlu menywod ym mhob rhan o'r sefydliad sy'n gweithio mewn rolau sy'n gysylltiedig â Gwyddoniaeth, Technoleg, Peirianneg a Mathemateg (#STEM) er mwyn helpu i Gadw De Cymru yn Ddiogel.

Mae Diwrnod Rhyngwladol Menywod a Merched mewn Gwyddoniaeth yn gyfle i ni ddathlu menywod ym mhob rhan o'r sefydliad sy'n gweithio mewn rolau sy'n gysylltiedig â Gwyddoniaeth, Technoleg, Peirianneg a Mathemateg (STEM) er mwyn helpu i Gadw De Cymru yn Ddiogel.

“Hoffwn ddiolch yn bersonol i’n holl gydweithwyr benywaidd yma yn Heddlu De Cymru sy’n gweithio mewn rolau cysylltiedig â Gwyddoniaeth, Technoleg, Peirianneg a Mathemateg (STEM). Ar ddechrau fy ngyrfa, ni allwn fod wedi rhagweld pwysigrwydd y datblygiadau a wnaed I helpu gadw De Cymru yn ddiogel.

“Ein pwrpas yw erlid troseddwyr, blaenoriaethu dioddefwyr, ac amddiffyn pobl fregus ac mae defnyddio STEM o fewn plismona yn sicrhau ymchwiliadau gwell. Er enghraifft, y llynedd gwelsom ddatblygiadau mewn gwyddoniaeth fforensig yn ein helpu i ddatrys achos o dreisio o'r 1980au. Mae hyn wedi darparu  rhywfaint o gyfiawnder i'r dioddefwr, ac o bosibl amddiffyn eraill rhag niwed.

“Mae’r datblygiad parhaus yn y meysydd hyn wedi creu buddion sefydliadol sylweddol a chyfleoedd datblygiad proffesiynol parhaus i’n swyddogion, staff a gwirfoddolwyr. Rhaid inni sicrhau bod ein gweithlu’n gynrychioliadol o’r cymunedau yr ydym yn eu gwasanaethu, ac rydym yn benderfynol o gynyddu nifer y menywod sy’n gweithio o fewn y rolau hyn. Dyna pam ei bod yn bwysig inni ddathlu cyflawniadau’r holl fenywod mewn rolau sy’n ymwneud â STEM ledled Heddlu De Cymru.” Uwcharolygydd Eve Davis, Arweinydd Rhyw, Heddlu De Cymru.

Mae Amy yn gweithio yn ein Huned Ymchwilio Gwyddonol ar y Cyd ac roedd yn rhan o'r tîm a helpodd i ddod â chyfiawnder i ddioddefwr trais rhywiol a ddigwyddodd yn 1980, fwy na 40 mlynedd yn ddiweddarach.

“Rwy'n wyddonydd fforensig sy'n gweithio yn y labordai glanhau DNA. Ochr yn ochr ag achosion cyfredol, rwyf hefyd yn helpu'r tîm adolygu gydag achosion heb eu datrys. Roedd yr achos penodol hwn yn llwyddiant ysgubol, ac mae'n dangos pa mor ymrwymedig ydym i ddatrys hyd yn oed y troseddau hynach nad ydynt yn sicr yn mynd yn angof.

“Wrth i dechnoleg, prosesau labordy a gwaith proffilio DNA ddatblygu, roedd hwn yn un o'r achosion a gafodd ei adolygu, ac oherwydd bod rhai o'r arddangosion wedi cael eu cadw o'r ymchwiliad cyntaf yn 1980, roedd modd i ni archwilio'r eitemau gan ddefnyddio'r dechnoleg sydd gennym heddiw a dod o hyd i broffil DNA y troseddwr. Gan ddefnyddio'r gronfa ddata DNA i chwilio am gyfatebiadau posibl, gwnaethom adnabod y troseddwr a'i ddwyn gerbron llys barn fwy na 40 mlynedd ar ôl y drosedd.”

Mae Ailsa wedi gweithio yn ein Huned Ymchwilio Gwyddonol ar y Cyd (JSUI) ers saith mlynedd a hi yw'r yw'r fenyw gyntaf i fod yn Dechnegydd Fideo Fforensig yn yr heddlu.

“Rwy'n gweithio fel Technegydd Fideo Fforensig yn Uned Delweddu Fforensig JSIU. Rydym yn gwasanaethu ardaloedd Heddlu De Cymru a Heddlu Gwent ac rwy'n casglu deunydd fideo teledu cylch cyfyng o leoliadau a safleoedd, yn ogystal â phrosesu deunydd sain a fideo yn y swyddfa ar gyfer y llys. Gall hyn gynnwys amlygu, niwlo a chwyddo.

“Mae ein rôl yn cynnwys archwilio, adfer a phrosesu pob math o ddeunydd fideo a sain tystiolaethol – o ddeunydd oddi ar gamerâu a wisgir ar y corff a ffonau symudol i waith gwella sain. Gall ein rôl olygu bod angen i ni fynd i amgylcheddau eithaf heriol, ond rwyf wrth fy modd!

“Gan mai uned ar y cyd ydym, mae'r rôl yn golygu fy mod yn teithio ar hyd a lled ardaloedd Heddlu Gwent a Heddlu De Cymru. Mae'r cyfan yn dibynnu ar ble y byddaf yn cael fy ngalw mewn diwrnod.  Rwyf hefyd yn hoffi'r ffaith fy mod yn gweld rhywbeth newydd bob dydd, a bod pob diwrnod yn wahanol. Mae teledu cylch cyfyng ym mhobman erbyn hyn; o gartrefi, i ffyrdd, i fusnesau, ac mae'n fath effeithiol iawn o dystiolaeth weledol, felly mae'n bwysig bod y deunydd fideo yn cael ei gasglu a'i brosesu'n gywir. Rwy'n hoffi teimlo fy mod yn gwneud gwahaniaeth er budd dioddefwyr troseddau ac ymchwiliadau. Fi yw'r fenyw gyntaf i fod yn Dechnegydd Fideo Fforensig yn ein heddluoedd, ac mae wedi bod yn wych gweld mwy o fenywod yn ymuno â'r uned dros y blynyddoedd.

“Fel menyw mewn rôl STEM ym maes plismona, rwyf wrth fy modd yn gwneud fy ngwaith. Mae'n ymwneud â gwyddoniaeth dechnegol ddiddorol iawn sy'n esblygu o hyd wrth i dechnolegau a meddalwedd newydd gael eu datblygu. Mae ein diwydiant yn gallu cael ei ddominyddu gan ddynion weithiau, ac rwy'n credu bod hynny'n deillio o'r ffaith bod mwy o fechgyn yn astudio TGCh yn yr ysgol ac yn dilyn gyrfa yn y maes hwnnw na merched. Does gen i ddim cefndir gwyddonol mewn gwirionedd; Mae gen i radd mewn Hanes ac rwy'n teimlo bod hynny wedi rhoi sylfaen dda i mi allu ymchwilio'n drylwyr, amddiffyn fy nghanfyddiadau a gallu llunio adroddiadau'n gywir.

“Byddwn yn annog unrhyw un sy'n ystyried gyrfa ym maes fforenseg i gofio nad yw o reidrwydd y tu hwnt i'ch cyrraedd dim ond am na wnaethoch astudio'r gwyddorau!”

Mae Abbi yn un o'n Hymchwilwyr Safleoedd Troseddau Cyffredin.

“Rwy'n archwilio safleoedd troseddau cyffredin fel bwrgleriaethau yn annibynnol, ac yn cynorthwyo ar safleoedd troseddau mawr a difrifol. Rwy'n mwynhau amrywiaeth fy rôl, gan fod pob diwrnod yn wahanol.

“Roeddwn yn meddwl bod gyrfa ym maes STEM y tu hwnt i'm cyrraedd gan nad oeddwn wedi astudio'r gwyddorau, ond drwy'r profiad gwaith roeddwn wedi ei gronni ym maes archaeoleg, bu modd i mi ddangos bod gennyf sgiliau trosglwyddadwy yn fy nghais.

“Am yrfa sy'n eich herio i addasu a meddwl yn ddynamig drwy'r amser, yn cynnig amgylchedd dysgu parhaus ni waeth ers faint o flynyddoedd rydych wedi bod yn gwneud y swydd ac yn gwerthfawrogi cydweithwyr benywaidd, byddwn yn ddi-os yn argymell Ymchwilio Safleoedd Troseddau.”