Carcharu dyn, 26 oed o Abertawe, am gyflawni nifer o droseddau

Cafodd George Tetzlaff, 26 oed o Abertawe, ei gyhuddo o gyflawni nifer o droseddau gan gynnwys:

• Ymwneud â chyflenwi cyffuriau Dosbarth A – Cocên yn Bennaf
• Bod ag Eiddo Troseddol yn ei feddiant
• Bod ag eitem lafnog yn ei feddiant
• Bod ag arf sy'n rhyddhau hylif neu nwy niweidiol yn ei feddiant

Cafodd ei ddedfrydu i bum mlynedd a saith mis yn y carchar yn Llys y Goron Abertawe ddydd Mawrth 6 Awst 2024, ar ôl pledio'n euog i'r holl droseddau.

Ddydd Sadwrn 29 Mehefin, cafodd Tetzlaff ei arestio ar ôl i swyddogion ymateb i adroddiad gan rywun a oedd wedi ei weld, am fod yr heddlu yn chwilio amdano i'w ddychwelyd i'r carchar. Ceisiodd redeg i ffwrdd ond cafodd ei ddal a'i arestio i'w ddychwelyd i'r carchar.

Cafodd Tetzlaff a'i fag eu chwilio, a daeth y swyddogion o hyd i gyllell glo, bagiau snap gwag clir, nwy CS ac arian parod yn y bag.

Wrth iddo gael ei dderbyn i'r ddalfa, gwelodd y swyddogion neges destun ar ffôn symudol Tetzlaff a oedd yn ymwneud â chyflenwi cyffuriau.

Dywedodd Sam Tobin, Cwnstabl yr Heddlu:

“Cafodd Tetzlaff ei ddal gan swyddogion, er gwaethaf ei ymdrechion i ddianc rhag yr heddlu. Tra'r oedd yn cael ei gadw yn y ddalfa, canfuwyd bod CHWISTRELL CS a chyllell glo yn ei feddiant, a daethpwyd o hyd i dystiolaeth ar ei ffôn yn ei gysylltu ag achosion o gyflenwi cyffuriau dosbarth A. Mae Heddlu De Cymru yn cymryd camau cadarn yn erbyn y math hwn o drosedd sy'n peri risg i'r rhai mwyaf agored i niwed yn ein cymunedau, gan sicrhau bod ardal De Cymru yn parhau i fod yn lle diogel i fyw ynddo.

Mae cuddwybodaeth gan y cyhoedd yn werthfawr iawn wrth i ni fynd i'r afael â throseddau cyfundrefnol. Rydym yn annog unrhyw un sydd â gwybodaeth yn ymwneud ag arfau neu gyflenwi cyffuriau i gysylltu â ni ar 101 neu drwy ffonio Crimestoppers ar 0800 555 111.”