Carchar i leidr a fu'n teithio ledled y DU i gyflawni troseddau

Bu lleidr yn teithio ledled y DU i gyflawni troseddau. Ond, daeth sbri droseddu'r gwladolyn o Rwmania i ben pan deithiodd i Bontypridd a chael ei arestio gan Heddlu De Cymru. Mae newydd gael ei garcharu a chaiff ei allgludo ar ôl cael ei ryddhau.

 

Dyma'r eiliad y cafodd Alexandru-Iulian Dima, 25 oed, o Rwmania, ei arestio gan swyddogion Heddlu De Cymru mewn dillad plaen ym Mhontypridd.

Cynhaliodd swyddogion ymgyrch 'sting', gan gredu y byddai'r troseddwr yn targedu eu tref yn fuan.

Sylwodd y staff yn Boots fod Dima yn eu siop a rhoddwyd gwybod i'r heddlu drwy ddefnyddio system radio a ddefnyddir gan fanwerthwyr ledled y dref sy'n eu galluogi i gysylltu'n uniongyrchol â swyddogion sydd ar batrôl.

Rhedodd Dima i ffwrdd ond ni allai ddianc rhag swyddogion yr heddlu a wnaeth ei ddal mewn maes parcio gerllaw.

Dyna ddiwedd ar ei ymgyrch ladrata ledled y DU – mewn cyfnod o 12 mis yn unig, llwyddodd i ddwyn cynhyrchion gwerth £60k o siopau Boots yng Nghymru, Lloegr a'r Alban.

Ddydd Iau, 8 Awst (2024), cafodd ei garcharu yn Llys y Goron Caerdydd am bedair blynedd ar ôl pleidio'n euog yn flaenorol i 32 o droseddau'n ymwneud â dwyn o siopau. Bydd gorchymyn allgludo yn sicrhau y bydd yn dychwelyd i Rwmania ar unwaith ar ôl cael ei ryddhau.

Swyddog Pontypridd, Cwnstabl yr Heddlu Liam Noyce:

“Gwnaethom edrych ar wybodaeth am ei droseddu a dewis y diwrnod roeddem yn credu y byddai'n cyrraedd y dref. Yn wir, daeth yr alwad gan y staff yn Boots a chafodd ei arestio, gan ddod â diwedd ar yr ymgyrch o droseddu a gyflawnodd mewn trefi a dinasoedd ledled y DU. Rydym yn deall pa mor bwysig yw manwerthwyr mawr a bach i'r dref ac yn benderfynol ac ymrwymedig i sicrhau eu bod yn cael eu hamddiffyn rhag troseddu.”