Ymchwiliad i lofruddiaeth ar Heol Caerffili

Mae dyn wedi cael ei gyhuddo o lofruddiaeth yn dilyn digwyddiad mewn cartref ar Heol Caerffili yng Nghaerdydd y rhoddwyd gwybod amdano yn ystod oriau mân ddydd Mawrth, 20 Awst.

Mae Alcwyn Thomas, 44 oed, o ardal y Mynydd Bychan yng Nghaerdydd wedi cael ei gyhuddo o lofruddiaeth a disgwylir iddo ymddangos gerbron Llys Ynadon Caerdydd yfory (dydd Gwener, 23 Awst).

Mae'r dioddefwr wedi cael ei enwi fel Victoria (Vicki) Thomas, 45 oed, o Heol Caerffili, Caerdydd.

Mae teulu Vicki wedi rhyddhau'r datganiad canlynol:

“Fel teulu, rydym yn torri ein calonnau bod ein merch, mam, chwaer, modryb, nith a ffrind yr ydym yn ei charu'n fawr wedi cael ei chymryd oddi wrthym mewn ffordd mor ofnadwy.

“Mae ein teulu wedi torri, a byddwn yn ei cholli am byth. Parchwch ein preifatrwydd a'n dymuniad i alaru yn ystod y cyfnod ofnadwy ac anodd hwn.”

Mae teulu Vicki yn cael cymorth gan swyddogion arbenigol.

Dywedodd y Ditectif Brif Arolygydd Matt Powell:

“Rydym yn cydymdeimlo â theulu Vicki sy'n parhau i gael eu diweddaru a'u cefnogi gan ein swyddogion cyswllt teuluol.

“Wrth i'n gwaith ymchwilio barhau ar y safle, hoffwn ddiolch i'r gymuned leol am ei chefnogaeth a'i dealltwriaeth.”