Ymchwiliad wedi'i lansio i farwolaeth amheus plentyn yn Abertawe
Cynnwys y prif erthygl
Mae Heddlu De Cymru yn ymchwilio i farwolaeth amheus bachgen chwech oed mewn tŷ yn ardal Gendros yn Abertawe.
Cafodd y gwasanaethau brys eu galw i Cwm Du Close am 8:30pm nos Iau 29 Awst.
Mae menyw 41 oed wedi cael ei harestio ar amheuaeth o lofruddiaeth, ac mae yn y ddalfa ym Mhen-y-bont ar Ogwr ar hyn o bryd.
Mae ystafell digwyddiad wedi cael ei sefydlu ac mae ymchwiliad yn cael ei arwain gan Dîm Troseddau Mawr yr heddlu.
Gwyddom fod y plentyn a'r fenyw yn byw gyda'i gilydd ac, ar hyn o bryd, nid yw'r heddlu yn chwilio am unrhyw un arall mewn cysylltiad â'r farwolaeth.
Dywedodd y Prif Uwch-arolygydd Chris Truscott, comander rhanbarthol Abertawe a Chastell-nedd Port Talbot:
"Mae hwn yn ddigwyddiad ofnadwy a fydd yn sioc i'r gymuned leol.
"Mae ditectifs yn gweithio i ganfod amgylchiadau marwolaeth y plentyn a bydd mwy o swyddogion yr heddlu i'w gweld yn yr ardal i gynnig sicrwydd i'r trigolion lleol.
"Nid yw dyfalu ar y cyfryngau cymdeithasol o gymorth a bydd yn achosi trallod i'r rhai yr effeithiwyd arnynt gan y digwyddiad hwn mewn cyfnod sydd eisoes yn anodd dros ben."