Mae Jack Liam Carroll wedi'i garcharu am 11 mlynedd am droseddau yn cynnwys trais rhywiol ac ymosod.

 

Mae Jack Liam Carroll wedi'i ddedfrydu i 11 mlynedd yn y carchar a chyfnod trwydded estynedig o 4 mlynedd ar ben hynny ar ôl cael ei ddyfarnu'n euog o 9 trosedd yn cynnwys trais rhywiol ac ymosod.

Gwadodd y dyn 27 oed o'r Caerau, Caerdydd y cyhuddiadau ond fe'i cafwyd yn euog o un achos o drais rhywiol, tri achos o ymosod drwy dreiddio, a phum achos o drais gan achosi niwed corfforol gwirioneddol.

Fe'i disgrifiwyd yn y llys fel unigolyn sy'n peri risg uchel i fenywod.

Wrth ddedfrydu yn Llys y Goron Caerdydd, ddydd Mercher, 29 Tachwedd gwnaeth y barnwr ganmol y ddioddefwraig am ei dewrder yn ystod yr treial a phan ddarllenodd ei datganiad personol dioddefwr yn uchel o flaen y diffynnydd.

Dywedodd y swyddog yn yr achos, y Ditectif Ringyll Shannon Walker, o Heddlu De Cymru: "Mae'r ddioddefwraig wedi dangos cryfder a thaerni drwy gydol yr ymchwiliad.

“Rydym yn gobeithio y bydd y ddedfryd yn dod â rhywfaint o ddiweddglo iddi ac yn caniatáu iddi adennill ei hyder a symud ymlaen â’i bywyd.

"Mae mynd i'r afael â thrais yn erbyn menywod a merched yn flaenoriaeth i Heddlu De Cymru. Rydym yn cymryd pob adroddiad am ymosodiad rhywiol o ddifrif ac yn annog dioddefwyr i roi gwybod am unrhyw droseddau o'r fath.”

Bydd Carroll yn y carchar am ddwy ran o dair o'i ddedfryd cyn y caiff ei ystyried am barôl. Cafodd hefyd ei wneud yn destun gorchymyn atal amhenodol ac yn destun gofynion hysbysiad troseddwr rhyw am oes.

Ceisiwch help a chymorth os ydych chi neu rywun rydych yn ei adnabod wedi dioddef trais rhywiol, ymosodiad rhywiol neu drosedd rywiol arall. Fyddwn ni ddim yn eich barnu: byddwn yn eich trin â sensitifrwydd a pharch, a byddwn bob amser yn rhoi eich iechyd a'ch llesiant yn gyntaf.

I gael rhagor o wybodaeth ewch i https://www.south-wales.police.uk/cy-GB/riportio/riportio/riportiwch/alpha-v1/cyngor/treisio-ymosod-rhywiol-a-throseddau-rhywiol-eraill/