Ffrwydrad yn Ystâd Ddiwydiannol Trefforest

Mae'r gwasanaethau brys yn parhau i fod ar safle tân ar Ffordd Hafren, Ystâd Ddiwydiannol Trefforest, Rhondda Cynon Taf.

Mae hyn yn dilyn adroddiadau am ffrwydrad mewn eiddo toc wedi 7.00pm neithiwr.

Mae swyddogion wedi dod o hyd i gorff ar ôl chwilio'r safle.

Er nad yw'r broses o adnabod y corff wedi'i chwblhau, mae swyddogion sydd wedi cael hyfforddiant arbenigol yn cefnogi teulu'r unigolyn sydd ar goll.

Dywedodd y Ditectif Uwch-arolygydd Richard Jones o Heddlu De Cymru:

“Rydym yn meddwl am deulu'r person sydd ar goll.

“Nawr bod y tân dan reolaeth, byddwn yn symud i'r cam ymchwilio er mwyn canfod beth achosodd y ffrwydrad hwn a'r tân dilynol.

“Mae'r ffyrdd yn cael eu hail-agor yn raddol ond bydd y digwyddiad yn dal i effeithio ar rai ffyrdd a busnesau yn yr ardal.

“Hoffwn ddiolch i drigolion a busnesau lleol am eu hamynedd a'u dealltwriaeth wrth i ni ddelio â'r digwyddiad hwn.”

Mae tîm ymchwilio ar y cyd o Wasanaeth Tân ac Achub De Cymru a Heddlu De Cymru, ar y cyd â'r Awdurdod Gweithredol Iechyd a Diogelwch, ar y safle i ganfod achos y tân.