Ditectifs yn enwi'r dyn a fu farw mewn digwyddiad yn Nhrefforest, Pontypridd

Gellir bellach enwi'r unigolyn a fu farw yn dilyn ymosodiad mewn eiddo ar Princess Street, Trefforest, ddydd Sul 17 Rhagfyr, fel Daniel Rae, 30 oed.

Dywedodd y Ditectif Uwch-arolygydd Mark O’Shea sy’n arwain yr ymchwiliad:

“Rydym yn parhau i feddwl am deulu a ffrindiau Daniel yn ystod y cyfnod anodd iawn hwn, a bydd ein Swyddogion Cyswllt â Theuluoedd arbenigol yn parhau i fod mewn cyswllt â'r teulu wrth i'n hymholiadau fynd rhagddynt.

“Hoffwn achub ar y cyfle hwn i roi sicrwydd i'r cyhoedd mai digwyddiad ar ei ben ei hun yw hwn ac ni chredir bod risg ehangach i'r cyhoedd ar yr adeg hon.

“Os gwnaethoch weld neu glywed unrhyw beth mewn perthynas â'r llofruddiaeth, ni waeth pa mor ddibwys ydyw yn eich barn chi, cofiwch gysylltu â ni. Gallai eich gwybodaeth ychwanegu sicrwydd at fanylion nad ydym wedi eu cadarnhau eto.

“Mae'r Tîm Ymchwilio i Droseddau Mawr yn ymchwilio i lofruddiaeth Daniel, ynghyd â swyddogion a staff o bob rhan o Dde Cymru.

“Mae nifer o gordonau'r heddlu yn dal i fod yn bresennol ar Princess Street a'r cyffiniau a hoffwn ddiolch i'r cyhoedd am eu hamynedd a'u dealltwriaeth. Mae'r cordonau wedi ein galluogi i gwblhau rhai ymholiadau fforensig manwl ac wedi ein helpu i ddatblygu'r ymchwiliad. Hoffwn ymddiheuro am unrhyw anghyfleustra y mae'r cordonau hyn wedi'i achosi i breswylwyr lleol, yn enwedig yn y cyfnod cyn y Nadolig.”

Gallwch gyflwyno deunydd fideo o ffonau symudol, camerâu teledu cylch cyfyng, clychau drws neu gamerâu dashfwrdd neu wybodaeth drwy ddilyn y ddolen hon ar gyfer yr ymchwiliad - https://mipp.police.uk/operation/62SWP23B81-PO1