Gwaith partneriaeth yr Heddlu wedi arwain at atafaelu cyffuriau gwerth £1 filiwn

Cafodd dyn o Lannau Mersi ei stopio gan heddlu Gorllewin Mersia ar 12 Mehefin 2023 fel rhan o ymgyrch ar y cyd gan Tarian, yr Uned Troseddau Cyfundrefnol ar gyfer De Cymru, ac Uned Troseddau Cyfundrefnol Rhanbarthol y Gogledd-orllewin (NWROCU).

Roedd y dyn 45 oed o Lerpwl yn cario 105kg o Amffetamin â gwerth stryd o dros filiwn o bunnoedd yng nghefn ei gar.

Diolch i waith cydweithredol Tarian, NWROCU, Heddlu Glannau Mersi a Heddlu Gorllewin Mersia, cafodd y cyffuriau eu hatal rhag cyrraedd pen eu taith yn Ne Cymru.

Dywedodd y Ditectif Arolygydd Rhys Richards, o Tarian: “Mae'r llwyddiant hwn yn deillio o rannu cudd-wybodaeth ranbarthol a chydweithredu ar draws heddluoedd.

“Mae gwaith cydweithredol o'r fath yn ein galluogi i fynd i'r afael ag achosion o fasnachu eitemau anghyfreithlon, fel cyffuriau ac arian parod ledled y DU.”

Dywedodd y Ditectif Arolygydd Steve Owens, Cydlynydd Llinellau Cyffuriau ar gyfer y Gogledd-orllewin: “Fel rhanbarth sydd â dau allforiwr cyffuriau mwyaf y Deyrnas Unedig, mae'n hanfodol ein bod yn gweithio gyda heddluoedd ac asiantaethau ledled y wlad i nodi'r grwpiau troseddu hynny sy'n gyfrifol, stopio eu cludwyr ac atal y niwed aruthrol y mae'r cyffuriau hyn yn ei wneud i gymunedau. Dyma enghraifft ardderchog o'r gwaith cydweithredol sy'n digwydd bob dydd i gyflawni hyn.”