Technoleg fforensig ddigidol newydd yn helpu i wella'r cymorth i ddioddefwyr trais rhywiol

Mae Heddlu De Cymru yn parhau i ddatblygu'r dechnoleg ddiweddaraf sy'n galluogi swyddogion i astudio ffonau dioddefwyr trais rhywiol yn llawer cyflymach nag y bu'n bosibl o'r blaen.

Daw'r buddsoddiad wrth i'r heddlu barhau i roi Ymgyrch Soteria, sy'n ddull newydd o ymchwilio i drais rhywiol, ar waith.

Fel rhan o'r fenter hon, mae technoleg o'r radd flaenaf i wella'r gefnogaeth sydd ar gael i ddioddefwyr trais ac ymosodiadau rhywiol a'u profiadau o ddelio â'r heddlu yn ystod amser trawmatig dros ben bellach ar gael drwy Gam 2 Prosiect Ymateb Adolygu Trais (RRRP2) Gwasanaeth Digidol yr Heddlu.

Mae'r fenter hon, a gefnogir gan gyllid sylweddol o £4m gan y Swyddfa Gartref, yn gam hollbwysig i wella galluoedd fforensig digidol yr heddlu ledled Cymru a Lloegr.

Mae'r pecyn arbenigol, sy'n cael ei ddefnyddio ar draws ardal yr heddlu, yn cynnwys labordai symudol a gliniaduron cadarn sy'n golygu y gallant archwilio dyfeisiau'r dioddefwyr mewn lleoliad sy'n addas iddynt. Mae hefyd yn sicrhau archwiliadau sydd wedi'u targedu a rhai penodol mewn modd amserol – sy'n cyfyngu ar yr amser y bydd yn rhaid i ddioddefwyr ei dreulio heb eu ffôn symudol.

Mae'r heddluoedd lle caiff y dechnoleg hon ei defnyddio eisoes yn dweud y bu gostyngiad sylweddol yn yr amser a gymerwyd i archwilio'r dyfeisiau symudol. Tra bod tua 36% ohonynt yn cael eu dychwelyd nawr i'w perchnogion yn lleoliad y drosedd, caiff hyd yn oed mwy ohonynt eu dychwelyd o fewn 24 awr.

Dywedodd y Ditectif Uwch-arolygydd Phil Sparrow:

“Mae hon yn rhaglen bwysig o gydweithio â'n partneriaid, sy'n cynnwys edrych ar y system cyfiawnder troseddol yn ei chyfanrwydd i nodi ble y gellir gwneud gwelliannau.

"Gall trais rhywiol a cham-drim rhywiol gael canlyniadau gydol oes i'r dioddefwr. Gyda'n gilydd, rydym am wneud yn siŵr ein bod yn gwneud popeth o fewn ein gallu i sicrhau ein bod yn ymdrin â'r rhai sy'n cyflawni'r troseddau hyn yn gyflym ac yn effeithiol, fel bod y dioddefwyr yn cael y cyd-wasanaeth gorau posibl.

"Croesewir yr arian a gawsom i brynu'r dechnoleg hon yn fawr, a heb os, bydd yn ein helpu i gyflawni'r nod hwnnw.”

Rhagor am ein gwaith yn archwilio ffonau symudol.

• Mae'r cabanau archwilio ffonau symudol yn ddyfeisiau a wnaed yn benodol sy'n cynnwys meddalwedd arbenigol sy'n galluogi swyddogion a staff yr heddlu sydd wedi eu hyfforddi i gael golwg ar wybodaeth sydd wedi'i storio ar ffôn symudol neu lechen.
• Gall dod o hyd i dystiolaeth yn gynnar ar ddyfais wella ein gallu i ddiogelu pobl sy'n agored i niwed yn sylweddol.
• Mae'n darparu llinellau ymholi y gall ymchwilwyr fynd ar eu trywydd, yn gyflymach nag y gallai prosesau blaenorol.
• Mae'r cabanau yn galluogi i chwiliadau wedi'u targedu gael eu cyflawni ar ddyfais, gan ddefnyddio meini prawf penodol fel y Dyddiad, yr Amser, a'r Rhif Ffôn.
• Gallant hefyd sicrhau chwiliad mewn rhannau o'r ddyfais fel negeseuon testun neu ffotograffau.
• Dim ond os bydd sail gyfreithiol a lle y bo'n briodol, lle gellir ei gyfiawnhau a'i fod yn gymesur â'r digwyddiad neu'r drosedd, y byddwn yn archwilio dyfais ddigidol.
• Os caiff tystiolaeth ei chanfod ar ddyfais, gellir datblygu'r llinellau ymholi yn llawer cynt. Bydd y ddyfais yn cael ei chyflwyno i'r Hyb Fforensig Digidol i'w harchwilio ymhellach, ac i baratoi ar gyfer y llys.
• Mae'r broses archwilio yn galluogi'r swyddog sydd wedi cael hyfforddiant i gael golwg ar y wybodaeth fydd wedi'i storio ar y ddyfais. Fodd bynnag, caiff y wybodaeth i gyd ei dileu'n ddiogel o'r cabanau seiber ar ddiwedd pob archwiliad.

Dyma ragor o wybodaeth am y ffordd y caiff data o ddyfeisiau digidol eu tynnu a'u rheoli.