Carcharu lleidr cyson am wyth mlynedd am gyfres o droseddau
Cynnwys y prif erthygl
Mae'r lleidr cyson, Ben Sullivan, o Gaerdydd, wedi cael ei garcharu am wyth mlynedd am gyfres o droseddau.
Cafodd Sullivan, 30 oed, ei arestio a'i gyhuddo y llynedd o gyfres o fwrgleriaethau o gartrefi a lleoliadau masnachol yng Ngogledd Caerdydd rhwng Rhagfyr 2021 ac Ebrill 2022, ac mae wedi cael dedfryd o chwe blynedd yn y carchar am hynny.
Parhaodd ditectifs i ymchwilio iddo am ei ran mewn bwrgleriaethau eraill a gwnaethant ddod o hyd i dystiolaeth teledu cylch cyfyng a fforensig yn ei gysylltu â digwyddiadau pellach, gan gynnwys lladrata o eiddo unigolyn 96 oed yng Nghyncoed.
Yn dilyn hyn, cafodd ei gyhuddo ym mis Mehefin 2023 o fwrgleriaeth waethygedig, 12 bwrgleriaeth a dwyn car. Cafodd ddedfryd o wyth mlynedd o garchar am y troseddau hyn.
Dywedodd y Ditectif Gwnstabl, Kate Perchard:
“Mae Ben Sullivan yn droseddwr mynych a pheryglus ac mae wedi cael ei garcharu am 14 o droseddau bwrgleriaeth pellach. Gobeithio y bydd y ddedfryd hirfaith hon yn rhoi cysur i'r cyhoedd bod Heddlu De Cymru yn cymryd adroddiadau am fwrgleriaeth, ar y cyd ag effaith y fath droseddau ar ddioddefwyr, o ddifrif.
"Cyflawnodd Sullivan gyfres o fwrgleriaethau gan adael effaith barhaol ar y dioddefwyr a hoffwn ddiolch iddynt am eu cefnogaeth a'u hamynedd gyda'r ymchwiliad.”
Plediodd Sullivan yn euog i'r holl droseddau.