Mae mwy na 50 o ddelwyr cyffuriau wedi cael eu dyfarnu'n euog ac yn y carchar am gyfanswm o fwy na 165 o flynyddoedd fel rhan o ymgyrch yng Nghaerdydd.

Mae mwy na 50 o ddelwyr cyffuriau wedi cael eu harestio ac yn bwrw dedfrydau o garchar â chyfanswm o fwy na 165 o flynyddoedd, fel rhan o Ymgyrch Talon – ymgyrch fawr i atal y cyflenwad o gyffuriau Dosbarth A yng Nghaerdydd.

Yn ystod ymgyrch gudd wyth mis o hyd, aeth swyddogion cudd allan ar strydoedd Adamsdown, Butetown, Cathays, Treganna, Grangetown, y Sblot a chanol y ddinas mewn ymateb i bryderon am achosion amlwg o gyflenwi cyffuriau.

Cafodd hyd at 300 o gyflenwadau cyffuriau eu hatafaelu, ynghyd â £53k mewn arian parod, 125 o ffonau symudol, ac amrywiaeth o arfau.

Dedfrydwyd tri dyn ddoe (dydd Iau, 21 Medi) yn Llys y Goron Caerdydd, sy'n golygu bod cyfanswm o 58 o unigolion wedi'u heuogfarnu, i ddedfryd gyfunol o 165.5 o flynyddoedd yn y carchar.

 

Honnodd Omer Mohamed, 22 oed, a'i frawd Yaser Mohamed, 20, o Grangetown, eu bod yn ddioddefwyr caethwasiaeth fodern a'u bod wedi cael eu gorfodi i gyflenwi cyffuriau o amgylch Caerdydd.

Ond ar ôl achos llys a barodd bythefnos, fe'u cafwyd yn euog o droseddau cyffuriau.

Cafodd Omer Mohamed ei euogfarnu o saith trosedd, gan gynnwys cynllwynio i gyflenwi heroin a chrac cocên. Cafodd ei garcharu am 7 mlynedd a 6 mis.

Cafodd Yaser Mohamed ei euogfarnu o bedair trosedd, gan gynnwys cynllwynio i gyflenwi heroin a chrac cocên. Cafodd ei garcharu am 5 mlynedd a 6 mis.

 

Plediodd trydydd dyn, Imon Jalil, 21 oed, o Lan yr Afon, yn euog i gynllwynio i gyflenwi heroin a chrac cocên. Cafodd ddedfryd ohiriedig o 20 mis.

Dywedodd y Ditectif Arolygydd, Grant Wilson, a arweiniodd yr ymgyrch ar gyfer Heddlu De Cymru:

“Cafodd Ymgyrch Talon ei lansio mewn ymateb uniongyrchol i bryderon a godwyd gan y gymuned ynghylch achosion amlwg o werthu cyffuriau yn ddyddiol a oedd yn effeithio ar ansawdd eu bywyd.

“Cafodd swyddogion cudd eu hanfon i ardaloedd megis canol y ddinas, Butetown a Grangetown, lle gwelwyd bod marchnad gwerthu cyffuriau agored.

“Roedd yr adborth gan y gymuned leol ar ôl yr ymgyrch yn ardderchog.  Aeth un aelod o'r cyhoedd at swyddog cymorth cymunedol yr heddlu ar y stryd i ddweud bod Butetown wedi cael ei thrawsnewid yn llwyr.

“Nid ydym yn naïf; gwyddom fod cyffuriau yn cael eu gwerthu o hyd, ond mae'r ymgyrch hon wedi cael effaith sylweddol ar yr achosion amlwg o werthu cyffuriau roedd cymunedau yn eu disgrifio i ni.”

Cafodd swyddogion cudd eu defnyddio rhwng mis Awst 2019 a mis Mawrth 2020, wrth i bandemig COVID-19 ddechrau, ac aed ati i arestio unigolion ym mis Gorffennaf 2020.

Ers hynny, mae unigolion wedi bod yn ymddangos gerbron y llys. Omer Mohamed, Yaser Mohamed, ac Imon Jalil yw'r diffynyddion olaf i'w dedfrydu fel rhan o Ymgyrch Talon.

Ychwanegodd DI Wilson: “Mae'r canlyniadau yn y llys o ganlyniad i ymroddiad pob swyddog a oedd yn rhan o Ymgyrch Talon, ond nid dyna yw'r diwedd.

“Nid digwyddiad untro yw hwn – mae adnabod, atal ac arestio gwerthwyr cyffuriau sy'n gweithredu yn ein cymunedau lleol yn parhau i fod yn flaenoriaeth feunyddiol i ni.”

“Gallwn weithredu ar y wybodaeth a gawn gan y cyhoedd, ac rydym yn gwneud hynny'n rheolaidd, felly parhewch i gysylltu â ni.”

Anogir unrhyw un sydd ag amheuon neu wybodaeth am achosion o ddelio mewn cyffuriau anghyfreithlon i gysylltu â ni.

🗪 Sgwrs Fyw https://www.south-wales.police.uk/cy-GB/

💻 Rhoi gwybod ar-lein https://www.south-wales.police.uk/cy-GB/riportio/riportio

📧 E-bostio [email protected]

📞 101

Ffoniwch 999 bob amser mewn argyfwng.