Mae cefnogwr pêl-droed wedi derbyn Gorchymyn Gwahardd Pêl-droed yn dilyn digwyddiad yn Stadiwm Dinas Caerdydd.

Mae cefnogwr pêl-droed wedi derbyn Gorchymyn Gwahardd Pêl-droed yn dilyn digwyddiad yn Stadiwm Dinas Caerdydd.

Cafodd Alexander Wilkinson o Birchgrove yn Abertawe, ei arestio am drosedd trefn gyhoeddus yn y gêm rhwng Dinas Caerdydd a Dinas Abertawe y tymor diwethaf yn Stadiwm Dinas Caerdydd.

Trwy gydol y gêm, cafodd yr unigolyn 41 oed ei weld yn symbylu, cam-drin yn eiriol, a gwneud arwyddion tuag at gefnogwyr y gwrthwynebwyr.

Hefyd, ceisiodd Wilkinson, a fu'n destun Gorchymyn Gwahardd Pêl-droed tair blynedd yn y gorffennol, ganfod ei ffordd drwy'r llinell wahanu rhwng y cefnogwyr cartref a'r ymwelwyr.

Ar 5 Medi, ymddangosodd yn Llys Ynadon Caerdydd a phledio'n euog i Drosedd Trefn Gyhoeddus Adran 5 a derbyn Gorchymyn Gwahardd Pêl-droed am bum mlynedd.

Fel rhan o'r drefn, ni chaiff Wilkinson fynd i mewn i unrhyw safle at ddiben gwylio unrhyw gêm bêl-droed yn y Deyrnas Unedig, sy'n cael ei rheoleiddio at ddibenion Deddf Gwylwyr Pêl-droed 1989.

Pan fydd gemau pêl-droed yn cael eu chwarae y tu allan i’r Deyrnas Unedig, bydd rhaid iddo roi gwybod i orsaf heddlu benodol ac ildio ei basbort.

Mae hefyd wedi cael ei wahardd rhag mynd i unrhyw dref neu ddinas ble fydd Clwb Pêl-droed Dinas Abertawe neu dîm Cymru yn chwarae.

Dywedodd PC Christian Evans o Heddlu De Cymru: "Mae'r mwyafrif helaeth o bobl sy'n mynychu Stadiwm Dinas Caerdydd yn ymddwyn yn gyfrifol ac yn mwynhau profiad diogel.
Ond pryd bynnag y bydd tystiolaeth o anhrefn sy'n gysylltiedig â phêl droed, rydym bob amser yn mynd ar ôl y rheini sy'n gyfrifol er mwyn sicrhau bod camau priodol yn cael eu cymryd.
Gobeithio y bydd canlyniadau'r llys hwn yn anfon neges glir na chaiff ymddygiad o'r fath ei oddef yn Stadiwm Dinas Caerdydd."