Diwrnod Coffa Cenedlaethol yr Heddlu
Cynnwys y prif erthygl
Ddoe, cafodd gwasanaeth blynyddol Diwrnod Coffa Cenedlaethol yr Heddlu ei gynnal yn y New Theatre yng Nghaerdydd. Yn y gwasanaeth, bu'r gwesteion yn coffáu bywydau ac yn anrhydeddu aberth holl swyddogion yr heddlu a fu farw wrth wasanaethu ledled y DU.
Ymhlith y rhai a oedd yn bresennol roedd teuluoedd a chydweithwyr sydd wedi colli anwyliaid wrth wasanaethu.
Yn unol â'r traddodiad, mae'r gwasanaeth yn cylchdroi rhwng pedair gwlad y Deyrnas Unedig a ddoe, cawsom yr anrhydedd o'i gynnal yn ein prifddinas.
Dywedodd Prif Gwnstabl Heddlu De Cymru, Jeremy Vaughan:
“Mae'n anrhydedd mawr cael croesawu gweithwyr o bob cwr o'r wlad i Gaerdydd ar gyfer Diwrnod Coffa Cenedlaethol blynyddol yr Heddlu – cyfle i bob un ohonom gofio a thalu teyrnged.
“Mae cofio am y rhai a fu farw, a dangos ein diolchgarwch twymgalon am eu gwasanaeth, yn bwysig iawn i ni fel teulu'r heddlu, ac mae Diwrnod Coffa Cenedlaethol yr Heddlu yn ein helpu i wneud hynny'n union.
“Rhaid i ni beidio ag anghofio am y rhai sydd wedi gwneud yr aberth eithaf wrth wasanaethu, ac ni wnawn hynny.”