Lleidr wedi'i arestio gan ddinesydd yn ystod bwrgleriaeth Nos Galan

Mae'r lleidr Aaron Goode wedi cael ei garcharu yn dilyn bwrgleriaeth ar Nos Galan, lle y cafodd ei gadw a'i arestio gan ddinesydd wedi iddo dorri i mewn i gartref dyn a'i ymladd.

Erfyniodd Goode, 24 oed, o Gaerdydd, ar y dioddefwr i'w ryddhau cyn i'r swyddogion gyrraedd i'w arestio.

Gwnaeth Goode a lleidr arall dargedu nifer o gartrefi ar 31 Rhagfyr, 2022. Digwyddodd y bwrgleriaeth cyntaf ar ôl iddo ef a dyn arall gael gafael ar Ford Focus tu allan i dŷ yn Llys-faen. Gwnaethant ddwyn cerdyn credyd, ac allweddi i hen gyfeiriad.

Yn yr ail gyfeiriad y gwnaethant ei fwrglera, cafodd dwy siaced gwerth £500 yr un eu cymryd, yn ogystal ag oriawr gwerth £1,000. Gwnaethant hefyd ddwyn allweddi Range Rover a mynd i mewn i hwnnw, a cheisio gyrru ymaith. Doedd Goode ddim yn llwyddiannus yn yr eiddo nesaf wedi iddo gael ei ddal a'i gadw gan berchnogion y cartref.

Dywedodd y Ditectif Gwnstabl Dafydd Beck: 

"Roedd hwn yn ymchwiliad difrifol a chymhleth a arweiniodd at ddau leidr yn cael eu cyhuddo o sawl bwrgleriaeth. Hoffwn hefyd ganmol gweithredoedd un unigolyn penodol a wynebodd ddau dresmaswr anhysbys yn ei gartref ei hun, gan lwyddo i ymaflyd yn Goode, a arweiniodd at arestio'r ddau unigolyn dan amheuaeth yn y pen draw.

"Cafodd gweithredoedd Goode a'i gyd-droseddwr ar y noson honno argraff ddifrifol ar lawer o drigolion sy'n byw yn ardal Llys-faen, Caerdydd. Roedd yn rhaid cosbi eu gweithredoedd, ac mae'r ddedfryd hon yn golygu ni allant barhau i gyflawni'r fath droseddau difrifol.

"Bydd Heddlu De Cymru yn parhau i gymryd camau cadarn yn erbyn y fath unigolion sy'n credu y gallant fynd i mewn i gartrefi pobl a chymryd eu heiddo heb unrhyw ganlyniadau."

Dedfrydwyd Goode i gyfanswm o bedair blynedd yn y carchar yn Llys y Goron Caerdydd yr wythnos diwethaf.