Ymgyrch yr heddlu i fynd i'r afael â delio cyffuriau ym mharciau Adamsdown.

Mae chwech o bobl wedi’u harestio a 100 o lapiadau o gyffuriau Dosbarth-A wedi’u hatafaelu gan yr heddlu yn Adamsdown.

Mae'r arestiadau yn rhan o ymgyrch barhaus i dargedu troseddwyr sy'n defnyddio parciau yn y rhan hon o Gaerdydd fel lleoliad i werthu cyffuriau.

Dywedodd y Rhingyll Frankie Baker:

“Chwilio am droseddwyr, a dod o hyd iddynt, yw’r hyn rydym yn ei wneud bob dydd, ond mae ymgyrch bwrpasol fel hon yn ein galluogi i ganolbwyntio ein hymdrechion.

“Mae’r ymgyrch wedi cynnwys y Tîm Cymdogaeth yn gweithio gyda chydweithwyr yng Ngwasanaeth Awyr Cenedlaethol yr Heddlu, yr uned gŵn, Heddlu Trafnidiaeth Prydain, a’r tîm beiciau oddi ar y ffordd.

“Rydym wedi ymrwymo i arestio delwyr cyffuriau a chadw parciau lleol yn ddiogel ac yn gyfeillgar i deuluoedd.”

Ymhlith y rhai a gafodd eu harestio yn ddiweddar roedd dyn 18 oed o Butetown, y daethpwyd o hyd i 57 o lapiadau o Crac Cocên ac 16 o lapiadau o Heroin ym Mharc Anderson yn ei feddiant.

Cafodd ei gadw gan swyddogion mewn dillad plaen gyda chymorth cydweithwyr o Wasanaeth Awyr Cenedlaethol yr Heddlu yn hofrennydd yr heddlu.

Dywedodd y Cynghorydd Owen Jones o Adamsdown:

“Yn wir ddiolchgar am y gwaith y mae Heddlu De Cymru yn ei wneud yn y maes hwn. Ni ddylai neb deimlo'n anniogel yn eu parciau lleol, ond yn anffodus mae ein cymuned yn cael ei difetha gan nifer bach o bobl hunanol sy'n meddwl y gallant ddianc rhag unrhyw beth.

“Mae’r heddlu’n ymateb, sy’n wych, ond fel bob amser, rwy’n annog trigolion i barhau i roi gwybod am unrhyw droseddau y maent yn eu gweld. Po fwyaf o wybodaeth sydd gan yr awdurdodau, y gorau y gallant weithredu.”

Cysylltwch â ni drwy un o’r ffyrdd canlynol:

🗪 Sgwrs Fyw https://www.south-wales.police.uk/cy-GB/

💻 Rhoi gwybod ar-lein https://www.south-wales.police.uk/cy-GB/riportio/riportio

📧 E-bost [email protected]

📞 101 neu Crimestoppers yn ddienw ar 0800 555 111

Ffoniwch 999 bob amser mewn argyfwng.