#DdimYrUn - blwyddyn yn ddiweddarach

#DdimYrUn |  Mae blwyddyn wedi mynd heibio ers i ni lansio ein hymgyrch #DdimYrUn, gan weithio ar y cyd â’r Uned Atal Trais, i addysgu pobl ifanc am realiti cario arf.

Mae’r ymgyrch yn amlygu peryglon a chanlyniadau troseddau cyllyll trwy straeon bywyd go iawn ac adnoddau addysgol, i helpu aelodau’r gymuned, rhieni, a phobl ifanc i addysgu eu hunain am yr effaith y gall troseddau cyllyll ei chael, yn ogystal â beth i’w wneud os ydynt, neu rywun maen nhw'n ei nabod, yn cael trafferth.

Ers ei lansio, mae'r ymgyrch ynghyd ag ymdrechion gan swyddogion a thimau arbenigol ar draws De Cymru, wedi gweld gostyngiad o 12% mewn troseddau cyllyll yn ein cymunedau.

Dywedodd yr Uwcharolygydd Esyr Jones, Arweinydd yr Heddlu ar gyfer Trais Difrifol, “Mae pob arf sy’n cael ei gymryd oddi ar y strydoedd yn gam bach tuag at lwyddiant, ond y nod ehangach yw atal yr arfau hynny rhag cael eu codi yn y lle cyntaf. Mae’r gostyngiad hwn mewn troseddau cyllyll yn gam i’r cyfeiriad cywir ond fel bob amser, rydym yn parhau i fod yn ymrwymedig i leihau hyn ymhellach.”

Dros y 12 mis diwethaf rydym wedi gweld dros 13,500 amweliadau â'r wefan a 1,000  o bobl wedi lawrlwytho ein pecyn adnoddau addysgol, gan gynnwys: 

• 295  o ysgolion i ddarparu gwersi atal troseddau cyllyll.
• 212  o glybiau ieuenctid a chwaraeon.
• 178  o bobl o dan 18 oed.
• 93  o rieni.

Mae ein cymunedau wedi chwarae rhan hanfodol wrth ein helpu i gyflwyno’r ymgyrch hon, gyda phartneriaid, lleoliadau addysgol a fforymau ieuenctid i gyd yn cyflwyno eu sesiynau eu hunain.

Dywedodd y Ditectif Brif Arolygydd Jason Herbert, o'r Uned Atal Trais, “Mae cadw ein pobl ifanc yn ddiogel a rhoi’r dechrau gorau posibl iddynt yn hollbwysig. Gall troseddau sy'n ymwneud â chyllyll effeithio ar unrhyw un, ac mae gan bob un ohonom ran i'w chwarae drwy addysgu, atal a mynd i'r afael â'r broblem yn ein cymunedau. I bawb sydd wedi bod yn cyflwyno sesiynau, rydym yn diolch i chi ac yn eich annog i barhau â’r gwaith da, mae wir yn gwneud gwahaniaeth cadarnhaol i’n hymdrechion i leihau troseddau cyllyll.”

I gael rhagor o wybodaeth am yr ymgyrch ac i lawrlwytho ein deunydd i'ch sesiynau eich hun, ewch i: www.nottheone.co.uk/cy/