Datganiad diweddaraf: Gwrthdrawiad Traffig Ffyrdd Angheuol yn Llaneirwg, Caerdydd: Datganiad ar y cyd gan Heddlu De Cymru a Heddlu Gwent

Mae Heddlu De Cymru yn parhau i ymchwilio i wrthdrawiad traffig ffyrdd angheuol a ddigwyddodd ar yr A48 yn ardal Llaneirwg yng Nghaerdydd.

Daeth y gwasanaethau brys o hyd i gerbyd Volkswagen Tiguan am 12.15am fore dydd Llun 6 Mawrth ar ôl i hofrennydd yr heddlu, yr heddlu a swyddogion tân gael eu hanfon i'r lleoliad.

Mae teuluoedd Rafel Jeanne, Darcy Ross ac Eve Smith, a fu farw yn y gwrthdrawiad, yn parhau i gael eu cefnogi gan swyddogion cyswllt â theuluoedd arbenigol.

Mae dau unigolyn arall yn parhau i fod mewn cyflwr difrifol yn Ysbyty Athrofaol Cymru.

Yn dilyn ymchwiliadau cychwynnol yr heddlu i'r gwrthdrawiad, gallwn gadarnhau'r canlynol:

Y tro diwethaf y cafodd y pum unigolyn eu gweld yn bendant oedd 2am fore dydd Sadwrn 4 Mawrth ym Mhentwyn.

Digwyddodd y gwrthdrawiad yn ystod oriau mân y bore ddydd Sadwrn 4 Mawrth, bydd yr union amser yn cael ei gadarnhau gan yr ymchwiliad, a fydd yn cynnwys ymholiadau teledu cylch cyfyng a system adnabod rhifau ceir yn awtomatig.

Cafodd Heddlu Gwent yr adroddiad unigolyn coll cyntaf am 7.34pm nos Sadwrn 4 Mawrth.

Cafodd Heddlu Gwent adroddiadau eraill bod unigolion ar goll am 7.43pm a 9.32pm nos Sadwrn 4 Mawrth.

Cafodd adroddiad unigolyn coll arall ei gyflwyno i Heddlu De Cymru am 5.37pm nos Sul 5 Mawrth.

Am 11.50pm nos Sul 5 Mawrth, gofynnwyd i hofrennydd yr heddlu chwilio ardal o Gaerdydd ac yn sgil hynny, daethpwyd o hyd i gerbyd mewn ardal goediog oddi ar yr A48.

Gwelodd swyddogion Heddlu Gwent, oedd ar droed, y car (Volkswagen Tiguan) am 12:02am fore dydd Llun 6 Mawrth ac arweiniodd hyn at Heddlu De Cymru yn creu cofnod am 12:15am.

Ar hyn o bryd, rydym o'r farn mai dim ond un cerbyd oedd yn rhan o'r gwrthdrawiad.

Dywedodd Prif Gwnstabl Cynorthwyol Heddlu Gwent, Mark Hoborough: “Mae hon yn sefyllfa drist dros ben ac rydym yn meddwl am deuluoedd a ffrindiau pob un o'r bobl ifanc dan sylw. Byddwn yn parhau i gefnogi'r ymchwiliad a gofynnwn i aelodau'r cyhoedd ymatal rhag dyfalu beth ddigwyddodd yn ystod y cyfnod hwn.”

Dywedodd y Prif Gwnstabl Cynorthwyol Jason Davies o Heddlu De Cymru: “Rydym yn dal i feddwl am y teuluoedd a phawb y mae'r digwyddiad trasig hwn wedi effeithio arnynt. Mae swyddogion arbenigol yn cynnal ymchwiliad manwl i geisio darganfod beth ddigwyddodd. Mae swyddogion cyswllt â theuluoedd yn cefnogi'r teuluoedd dan sylw ar adeg sy'n sicr o fod yn eithriadol o anodd iddynt.”

Mae Heddlu Gwent a Heddlu De Cymru wedi cyfeirio'r mater at Swyddfa Annibynnol Ymddygiad yr Heddlu, fel sy'n arferol o dan yr amgylchiadau hyn.