Cadw canol dinas Caerdydd yn ddiogel ac yn groesawgar oedd nodau ymgyrch ddiweddar gan yr heddlu a arweiniodd at arestio 31 o bobl.

Cadw canol dinas Caerdydd yn ddiogel ac yn groesawgar oedd nodau ymgyrch ddiweddar gan yr heddlu a arweiniodd at arestio 31 o bobl.

Cafodd y rhai dan amheuaeth eu harestio am droseddau yn cynnwys delio cyffuriau, lladrad, a methu ag ymddangos gerbron y llys yn ystod yr ymgyrch a barodd mis.

Enghreifftiau o'r arestiadau:

• Cafodd dyn 30 oed, o Trowbridge ei ddal â 17 o becynnau o grac cocên yn ei feddiant ar John Street.
• Yn dilyn achos o stopio a chwilio yn Bakers Row, darganfuwyd bod gan ddyn 23 oed o Adamsdown 34 o becynnau o heroin a chrac cocên yn ei feddiant.
• Gwelwyd unigolyn dan amheuaeth yn beicio o amgylch canol y ddinas ar feic Next; ni ddaethpwyd o hyd i unrhyw gyffuriau yn ei feddiant ond cafodd y dyn 32 oed o Butetown ei arestio am ddwyn y beic.
• Cafodd menyw 19 oed o Gaerau ei harestio am dorri mechnïaeth a dwyn bag llaw dylunydd gwerth £160.

Dywedodd y Rhingyll Gareth Davies:“Chwilio am droseddwyr, a dod o hyd iddynt, yw’r hyn rydym yn ei wneud bob dydd, ond mae ymgyrch bwrpasol fel hon yn ein galluogi i ganolbwyntio ein hymdrechion.

“Rydym yn ymwybodol o bryderon am ddelio cyffuriau ac ymddygiad gwrthgymdeithasol cysylltiedig yng nghanol y ddinas, a gobeithiwn y bydd yr ymgyrch hon yn rhoi tawelwch meddwl i'r cyhoedd.

“Mae'r swyddogion ymateb a’r Tîm Plismona yn y Gymdogaeth wedi bod yn cydweithio i greu amgylchedd gelyniaethus i’r rhai sy’n meddwl ei bod yn iawn dod i ganol y ddinas i ddelio cyffuriau, dwyn a chyflawni troseddau eraill.

“Rydym yn gweithio’n galed i gadw canol dinas Caerdydd yn lle diogel a chroesawgar.”

Yn ogystal ag arestio'r bobl dan amheuaeth, gweithiodd swyddogion yn ddyddiol gyda phartneriaid a'r gymuned fusnes i'w gwneud yn ymwybodol o'r ymgyrch a'u hannog i roi gwybod am ddigwyddiadau.

Dywedodd llefarydd ar ran Cyngor Caerdydd:“Mae’n amlwg bod cael swyddogion ar lawr gwlad yn gwneud gwahaniaeth enfawr. Yr hyn rydym yn sylwi arno yw llai o droseddwyr cyson. Yn syml, nid yw’r un bobl yr oeddem yn arfer delio â nhw o ddydd i ddydd ar hyd y lle, ac mae hyn yn helpu i wneud canol y ddinas yn amgylchedd diogel a chroesawgar.”