Menyw yn cael ei charcharu am gamymddwyn mewn swydd gyhoeddus

Anfonwyd menyw 39 oed o Gasnewydd i'r carchar am chwe blynedd ar ôl iddi ei chael yn euog o gamymddwyn mewn swydd gyhoeddus.

Roedd Rachel Simpson yn gweithio fel paragyfreithwraig yng Ngwasanaeth Erlyn y Goron pan gafodd ei harestio ym mis Mehefin 2020 gan swyddogion o Uned Atal Llygredigaeth Heddlu De Cymru. Cafodd yr achos ei arwain gan Tarian, Uned Troseddau Cyfundrefnol Rhanbarthol ar gyfer ardal de Cymru.

Yn dilyn tystiolaeth a ddatgelwyd drwy'r ymchwiliad i weithgarwch grŵp troseddau cyfundrefnol yn ardal Casnewydd, daeth yn amlwg fod Simpson wedi bod yn darparu gwybodaeth o ffynonellau'r heddlu a Gwasanaeth Erlyn y Goron i grwpiau troseddu cyfundrefnol yng Nghasnewydd ac yn ddiweddarach ar Lannau Mersi ers nifer o flynyddoedd. 

Dywedodd y Ditectif Arolygydd Matt Houghton o Tarian: “Roedd Simpson mewn swydd o ymddiriedaeth a chyfrifoldeb o fewn y CPS â'i bradychodd, gan siomi ei chydweithwyr, yr heddlu a’r cyhoedd.

“Mae ein hymchwiliad wedi arwain at ddwy drosedd o gamymddwyn mewn swydd gyhoeddus a 29 o droseddau yn gysylltiedig â'r ddeddf camddefnyddio cyfrifiaduron ac roedd cymaint o dystiolaeth yn ei herbyn fel nad oedd ganddi lawer o ddewis ond i bledio'n euog cyn gynted â phosibl.”

Dywedodd Andrew Penhale, Prif Erlynydd y Goron: “Fel un o gweithiwr Gwasanaeth Erlyn y Goron, roedd Rachel Simpson mewn rôl o ymddiriedaeth a dim ond pan fo'n angenrheidiol i'w swydd roedd disgwyl iddi gael gafael ar wybodaeth sensitif a chyfrinachol.

“Roedd hi'n cael gafael ar ddeunydd yn aml pan nad oedd angen busnes ac, ar ddau achlysur, cafodd y deunydd sensitif a gafodd ei basio ymlaen i droseddwyr cyfundrefnol.

“Mae Gwasanaeth Erlyn y Goron yn disgwyl i'r holl staff weithredu ag unplygrwydd wrth drin data a gedwir ar ei systemau ac roedd ymddygiad Simpson yn is o lawer na'r safonau hyn. Ni fyddwn yn oedi cyn erlyn unigolion sy'n ymddwyn yn anghyfreithlon. Hefyd rydym yn adolygu ein systemau digidol yn gyson i sicrhau eu bod mor ddiogel â phosibl.”