Dewrder aruthrol gan swyddogion Pen-y-bont ar Ogwr

Yn ystod oriau mân y bore ar 4 Ebrill, daeth PC Amy Sutton a'r Cwnstabl Gwirfoddol Olivia Lester ar draws dyn yn bygwth neidio oddi ar bont yng nghanol tref Pen-y-bont ar Ogwr.

Wrth i'r swyddogion geisio siarad â'r dyn, dringodd drosodd i ochr anghywir y rheiliau a dangosodd fwriad i neidio.

Ymatebodd Amy ac Olivia yn gyflym drwy ddal gafael yn y dyn, a aeth ati wedyn i frwydro â nhw a cheisio neidio i'r afon islaw, gan weiddi arnynt i ‘adael iddo fynd’.

Ar un adeg, roedd y dyn yn hongian yn gyfan gwbl o'r bont. Roedd yn cael ei ddal i fyny wrth ei freichiau gan Amy ac Olivia, a gymerodd cryn gryfder ac egni.

Drwy gydol yr amser hwn, defnyddiodd y ddau swyddog eu dyfeisiau radio i gyfathrebu mewn ffordd wych, gan alluogi swyddogion ychwanegol i ddod o hyd iddynt a'u helpu'n gyflym i dynnu'r dyn dros y rheiliau i dir diogel.

Dywedodd y Prif Arolygydd Rob Miles:

“Rwy'n eithriadol o falch o PC Amy Sutton a'r Cwnstabl Gwirfoddol Olivia Lester.

“Nid oes gennyf unrhyw amheuaeth y byddai'r dyn, heb eu hymyrraeth amserol ac arwrol nhw, wedi llwyddo i neidio oddi ar y bont, a fyddai'n debygol o fod wedi arwain at anaf difrifol neu farwolaeth. Diolch i ddewrder a phroffesiynoldeb aruthrol Amy ac Olivia, mae bywyd person agored i niwed wedi'i achub ac mae bellach mewn lle diogel.”