Carcharu dyn o Aberdâr am droseddau rhywiol hanesyddol yn erbyn plant

Gwnaeth Mark Thompson, o Aberdâr, gam-drin bachgen yn rhywiol dros gyfnod o ddwy flynedd, gan ddechrau pan oedd y bachgen ond yn wyth oed.

Roedd y bachgen yn gwybod bod hynny'n anghywir, ond roedd arno ormod o ofn i ddweud wrth neb. Cadwodd yr hyn a ddigwyddodd iddo'n gyfrinach am dros ddeng mlynedd – tan 2021, pan ddatgelodd yn ddewr fod Thompson wedi'i gam-drin.

Lansiwyd ymchwiliad a chafodd Thompson ei arestio a'i gyhuddo.

Aeth y mater i dreial ac yn dilyn hynny, cafwyd Thompson yn euog o nifer o droseddau rhywiol.

Ddydd Gwener 28 Ebrill, cafodd y dyn 39 oed ei garcharu am 16 mlynedd am drais rhywiol, denu plentyn i gymryd rhan mewn gweithgarwch rhywiol, ac ymosodiad rhywiol.

Dywedodd y Ditectif Gwnstabl Emma Songhurst, a arweiniodd yr achos:

“Hoffwn ganmol y dioddefwr a'i deulu am y dewrder a ddangoswyd ganddynt drwy'r ymchwiliad hwn.

“Mae gan bob plentyn yr hawl i dyfu i fyny heb ofn a chamdriniaeth, ac rwy'n gobeithio y bydd yr achos hwn yn dangos ein hymroddiad a'n penderfyniad i fynd ar drywydd cyfiawnder i unrhyw un sydd wedi dioddef fel hyn.

“Hoffwn annog unrhyw un sydd wedi dioddef trosedd debyg i roi gwybod i ni amdano, ni waeth faint o amser sydd wedi mynd heibio, gan y byddwn yn ymchwilio'n llawn i'r drosedd ac yn rhoi cefnogaeth lawn i'r unigolyn.”

Gellir rhoi gwybod am ymosodiadau rhyw neu achosion o gamdriniaeth drwy 101, neu drwy gysylltu â Crimestoppers yn ddienw ar 0800 555 111.

I gael gwybodaeth, canllawiau a sicrwydd, ewch i: https://www.south-wales.police.uk/cy-GB/riportio/riportio/riportiwch/alpha-v1/cyngor/treisio-ymosod-rhywiol-a-throseddau-rhywiol-eraill/