Marwolaeth Darren Moore: Dyn wedi'i arestio

Mae heddlu sy'n ymchwilio i farwolaeth Darren Moore yng nghanol dinas Caerdydd wedi arestio dyn 50 oed ar amheuaeth o ddynladdiad.

Mae'n cael ei gadw yn y ddalfa ac mae teulu Mr Moore wedi cael eu hysbysu.

Daethpwyd o hyd i Darren Moore, 39 oed o Gasnewydd, mewn lôn ger Windsor Place a Park Lane nos Sul (22 Ionawr).

Cynhaliwyd post-mortem ac mae archwiliadau pellach yn mynd rhagddynt i ganfod achos y farwolaeth.

Dywedodd y Ditectif Brif Arolygydd Paul Raikes o Heddlu De Cymru: “Nid yw'r ymchwiliadau cychwynnol wedi datgelu na chadarnhau unrhyw achos amlwg i'r farwolaeth eto, ond mae ymholiadau helaeth yn parhau i ganfod achos ac amgylchiadau marwolaeth Mr Moore.

“Hoffwn ddiolch i'r gymuned am y cymorth rhagorol y mae wedi ei roi i'r ymchwiliad hyd yn hyn, sydd wedi bod yn ddefnyddiol iawn, a hoffwn apelio ar unrhyw un sydd â gwybodaeth i gysylltu â ni.

"Eto hefyd, gofynnaf yn barchus i bobl ymatal rhag dyfalu beth sydd wedi digwydd ar y cyfryngau cymdeithasol a gadael i ymchwiliad yr heddlu fynd rhagddo'n ddirwystr."

Mae ditectifs yn apelio ar unrhyw un a all fod wedi gweld Darren yng nghanol dinas Caerdydd yn ystod oriau mân bore dydd Sul i gysylltu â nhw.

Maent yn awyddus i siarad ag unrhyw un a oedd yn ardal Park Lane a Windsor Place rhwng 3am a 7am.

Gwelwyd Darren ddiwethaf tua 5am wedi'i wisgo mewn drag ac roedd ganddo wyneb llawn o golur, ffrog werdd lachar, wig felen, sodlau uchel diamanté a bag llaw i gydweddu.

Mae swyddogion cyswllt â theuluoedd sydd wedi'u hyfforddi'n arbennig yn cefnogi ac yn hysbysu'r teulu.

Dywedodd yr Uwch-arolygydd Michelle Conquer, Pennaeth Gweithrediadau yn Uned Reoli Sylfaenol Caerdydd a'r Fro:“Rydym yn deall bod marwolaeth Darren Moore, a oedd yn artist drag adnabyddus yng Nghaerdydd, wedi achosi braw a gofid i'r gymuned leol ac ehangach.

“Wrth i'r ymchwiliad barhau, bydd presenoldeb yr heddlu yn amlwg o hyd yng nghanol y ddinas drwy ein Tîm Plismona yn y Gymdogaeth.

“Mae Heddlu De Cymru yn falch o gynrychioli a diogelu'r holl gymunedau y mae'n eu gwasanaethu.

“Mae gan Gaerdydd draddodiad hir a balch o gydnabod, dathlu ac amddiffyn cydraddoldeb ac amrywiaeth. Gofynnir i unrhyw un sydd â phryderon gysylltu â Heddlu De Cymru yn gyfrinachol.”

Gofynnir i unrhyw un sydd â gwybodaeth gysylltu â Heddlu De Cymru gan ddyfynnu cyfeirnod 2300022718 drwy un o'r dulliau canlynol:

🗪 Sgwrs Fyw (9am-4pm, o ddydd Llun i ddydd Gwener) https://www.south-wales.police.uk/

💻 Cysylltwch â ni drwy https://bit.ly/SWPProvideInfo

📧 E-bost [email protected]
*Ffoniwch 999 bob amser mewn argyfwng*