Marwolaeth Darren Moore: Apêl am wybodaeth a theyrnged gan y teulu

 

Mae'r dyn fu farw yng nghanol dinas Caerdydd ddydd Sul, 22 Ionawr, wedi cael ei enwi fel Darren Moore, 39 oed o Gasnewydd.

Cafodd yr heddlu eu galw i lôn ger Windsor Place a Park Lane am 7:36pm.

Mae ditectifs yn apelio ar unrhyw un a all fod wedi gweld Darren yng nghanol dinas Caerdydd yn ystod oriau mân fore dydd Sul i gysylltu â nhw.

Maent yn awyddus i siarad ag unrhyw un a oedd yn ardal Park Lane a Windsor Place rhwng 3am a 7am.

Gwelwyd Darren ddiwethaf tua 5am wedi'i wisgo mewn drag ac roedd ganddo wyneb llawn o golur, ffrog werdd lachar, wig felen, sodlau uchel diamanté a bag llaw i gydweddu.

Dywedodd y Ditectif Brif Arolygydd Paul Raikes, o Dîm Ymchwilio i Droseddau Mawr Heddlu De Cymru: "Mae ymholiadau helaeth yn cael eu cynnal i sefydlu achos ac amgylchiadau marwolaeth Mr Moore. Rydym yn meddwl am ei deulu a'i ffrindiau ar yr adeg hon.

“Cynhaliwyd post-mortem gan y Swyddfa Gartref ac mae archwiliadau pellach yn mynd rhagddynt i ganfod achos y farwolaeth

“Hoffwn ddiolch i'r gymuned am y cymorth rhagorol y mae wedi ei roi i'r ymchwiliad hyd yn hyn yr wythnos hon, sydd wedi bod yn ddefnyddiol iawn, a hoffwn apelio ar unrhyw un sydd â gwybodaeth i gysylltu â ni.

"Hefyd, gofynnaf yn barchus i bobl ymatal rhag dyfalu beth sydd wedi digwydd ar y cyfryngau cymdeithasol a gadael i ymchwiliad yr heddlu fynd rhagddo'n ddirwystr“

Mae ystafell ddigwyddiadau wedi'i sefydlu yng Ngorsaf Heddlu Canol Caerdydd ac mae swyddogion cyswllt teulu sydd wedi'u hyfforddi'n arbennig yn cefnogi ac yn hysbysu ei deulu. 

Dywedodd yr Uwch-arolygydd Michelle Conquer, Pennaeth Gweithrediadau yn Uned Reoli Sylfaenol Caerdydd a'r Fro:“Rydym yn deall bod marwolaeth Darren Moore, a oedd yn artist drag adnabyddus yng Nghaerdydd, wedi achosi braw a gofid i'r gymuned leol ac ehangach.

“Wrth i'r ymchwiliad barhau, bydd presenoldeb yr heddlu yn amlwg o hyd yng nghanol y ddinas drwy ein Tîm Plismona yn y Gymdogaeth.

"Mae tâp ynysu’r heddlu yn ei le tra bod ymholiadau'n parhau yn y fan a'r lle, ac rydyn ni'n diolch i'r gymuned am ei chefnogaeth ar yr adeg hon.

“Mae Heddlu De Cymru yn falch o gynrychioli a diogelu'r holl gymunedau y mae'n eu gwasanaethu.

“Mae gan Gaerdydd draddodiad hir a balch o gydnabod, dathlu ac amddiffyn cydraddoldeb ac amrywiaeth. Gofynnir i unrhyw un sydd â phryderon gysylltu â Heddlu De Cymru yn gyfrinachol.”

 

Teyrnged gan y Teulu:

Roedd Darren Moore yn ŵr, mab, brawd, ewythr a ffrind cariadus. Roedd yn gymaint o hwyl ble bynnag y byddai, ac wrth ei fodd yn cymdeithasu.
Roedd ganddo lawer o amser i bobl, a byth yn barnu eraill.
Hoffai gŵr a theulu Darren ddiolch i bawb am eu cefnogaeth, ond mae angen amser i alaru arnynt nawr ac maent yn gofyn am breifatrwydd ar hyn o bryd.

 

Cysylltwch â Heddlu De Cymru, gan ddyfynnu cyfeirnod 2300022718 drwy un o'r dulliau canlynol:

🗪 Sgwrs Fyw (9am-4pm, o ddydd Llun i ddydd Gwener) https://www.south-wales.police.uk/

💻 Cysylltwch â ni drwy https://bit.ly/SWPProvideInfo

📧 E-bost [email protected]

📞 101