Heddlu De Cymru yn derbyn mwy na 6,500 o alwadau brys dros gyfnod yr ŵyl

Gwnaethom dderbyn cyfanswm o fwy na 6,500 o alwadau 999 dros gyfnod y Nadolig a'r Flwyddyn Newydd.

Yn ystod y 10 diwrnod rhwng Noswyl Nadolig a Gwyl y Banc ar ddydd Llun 2 Ionawr, gwnaed cyfanswm o 6,574 alwadau i'n gwasanaeth 999 – cyfartaledd o 27 bob awr.

Yn ystod yr un cyfnod, gwnaed cyfanswm o 6,398 o alwadau nad oeddent yn rhai brys i'n gwasanaeth 101 hefyd.

Mae cyfnod y Nadolig a'r Flwyddyn Newydd bob amser yn adeg lle ceir galw uchel am ein hystafell reoli, neu'r Ganolfan Gwasanaethau Cyhoeddus. 

Er y gall fod yn rhwystredig i chi orfod aros i ni ateb eich galwad, rydym yn gweithio'n galed i wneud hynny cyn gynted â phosibl.

Yn ogystal â galwadau, ymatebodd ein timau hefyd i gannoedd o ffurflenni ar-lein, negeseuon e-bost a negeseuon uniongyrchol ar y cyfryngau cymdeithasol.

Ar yr un pryd, mae'r amrywiaeth eang o dimau eraill sy'n gweithio yn ein Canolfan Gwasanaethau Cyhoeddus – gan gynnwys staff sy'n neilltuo swyddogion yr heddlu i achosion unigol, swyddogion arbenigol sy'n ymdrin â phobl sydd wedi mynd ar goll, swyddogion cuddwybodaeth, swyddogion datrys digwyddiadau, rheolwyr digwyddiadau'r heddlu a goruchwylwyr – oll wedi bod yn cefnogi pobl mewn angen ac yn blaenoriaethu amrywiaeth eang o ddigwyddiadau.

Dywedodd yr Uwch-arolygydd Dean Thomas:

“Yn draddodiadol, cyfnod yr wyl yw adeg brysuraf y flwyddyn. Rwy'n ddiolchgar iawn i'm cydweithwyr sy'n parhau i ddangos cymaint o ymroddiad ac ymrwymiad, hyd yn oed pan fydd eu teuluoedd a'u ffrindiau wrthi'n mwynhau eu hunain dros gyfnod y Nadolig o bosibl.
“Mae ein timau yn gweithio'n ddiflino i ymateb i'ch galwadau a'ch cysylltiadau, ond yn amlwg, yn ystod cyfnodau prysurach, mae ein hadnoddau yn wynebu mwy o bwysau nag arfer. 
“Wrth reswm, bydd angen i ni roi blaenoriaeth i'r digwyddiadau mwyaf difrifol bob amser. Gallwch hefyd ein helpu ni i'ch helpu chi, drwy ddeialu 999 mewn argyfwng yn unig. Os nad yw'n argyfwng, efallai hefyd y byddai'n well gennych gysylltu â ni ar-lein – drwy ein cyfleuster sgwrs fyw, ein gwefan, ein tudalennau ar y cyfryngau cymdeithasol neu drwy e-bost. Mae hyn yn helpu i leihau'r galw ar y llinellau ffôn ymhellach ac yn sicrhau y gallwn ateb y galwadau hynny gan y rheini y mae'n well ganddynt ffonio. 
“Dylech ystyried hefyd a yw eich ymholiad yn ymholiad y gallwn ni ymdrin ag ef. Eich awdurdod lleol sydd yn y sefyllfa orau i helpu â llawer o faterion, fel parcio, tipio anghyfreithlon neu niwsans swn.”

Rydym wrthi'n recriwtio swyddogion derbyn galwadau yn ein Canolfan Gwasanaethau Cyhoeddus. I gael rhagor o wybodaeth ac i wneud cais, ewch i adran gyrfaoedd ein gwefan.

Mae amrywiaeth o ffyrdd y gallwch gysylltu â ni pan nad yw'n argyfwng, gan gynnwys drwy ffurflenni ar-lein ar ein gwefan; drwy'r cyfleuster sgwrs fyw ar ein gwefan (ar gael rhwng 9am a 4pm o ddydd Llun i ddydd Gwener); drwy e-bostio [email protected]; drwy anfon neges breifat ar un o gyfrifon swyddogol Heddlu De Cymru ar Facebook neu Twitter; neu drwy 101.

Mewn argyfwng, ffoniwch 999 bob amser.