Ffordd Ynysybwl, Pontypridd – enwi'r dioddefwyr, teyrnged ac apêl bellach

Mae'r ddynes a'r dyn, y ddau yn 32 oed, a fu farw yn dilyn gwrthdrawiad traffig ffyrdd ar Ffordd Ynysybwl ym Mhontypridd ddydd Gwener 27 Ionawr wedi cael eu henwi.

Roedd Kayleigh Cornwell yn 32 oed ac o ardal Hampshire. Mae ei theulu wedi talu'r deyrnged ganlynol iddi:

“Roedd Kayleigh yn ferch, yn chwaer ac yn fam i bump o blant prydferth yr oedd yn eu caru ac a oedd yn ei charu hi hefyd.

“Roedd bywyd Kayleigh yn gythryblus ond gwnaeth y gorau ohono ac roedd yn gallu gweld dyfodol iddi ei hun. Mae ein calonnau wedi torri.

“Rydym yn gobeithio fod Kayleigh mewn hedd ac y bydd yn symud i fywyd gwell, gan wybod cymaint roedd pawb yn ei charu.”

Roedd Jason Morgan yn 32 oed ac o ardal Ynysybwl, Pontypridd. Mae aelodau ei deulu yn ddiolchgar i bawb a fu'n ymwneud â'r achos ac maent yn meddwl am yrrwr y cerbyd a oedd yn y gwrthdrawiad.

Mae Heddlu De Cymru yn parhau i ymchwilio i'r gwrthdrawiad traffig ffyrdd a ddigwyddodd ar y B4273, Ffordd Ynysybwl, Pontypridd, am 6.30pm ddydd Gwener 27 Ionawr.

Roedd Ford Focus du a tri cherddwr yn rhan o'r gwrthdrawiad.

Hoffai swyddogion glywed gan unrhyw un a allai fod wedi gweld y gwrthdrawiad neu y gallai fod ganddo fideo camera dashfwrdd o'r digwyddiad.

Nid ydym yn chwilio am unrhyw un arall mewn cysylltiad â'r digwyddiad hwn. Arhosodd y gyrrwr yn y man y digwyddodd y gwrthdrawiad er mwyn helpu'r swyddogion.

Rydym yn meddwl am bawb y mae'r digwyddiad hwn wedi effeithio arnynt.

Mae swyddogion yn parhau i apelio ar unrhyw un a allai fod wedi gweld y gwrthdrawiad, neu sydd â deunydd teledu cylch cyfyng neu fideo camera dashfwrdd a allai fod wedi recordio'r digwyddiad, i gysylltu â nhw drwy un o'r ffyrdd canlynol gan ddyfynnu'r rhif digwyddiad 2300028708.

• Sgwrs Fyw https://www.south-wales.police.uk/
• Cysylltwch â ni drwy https://bit.ly/SWPProvideInfo
• E-bost [email protected]
• 101

Ffoniwch 999 bob amser mewn argyfwng.