Dosbarthiadau hunanamddiffyn ar gael am ddim i fenywod a merched

Mae gwahoddiad i fenywod a merched ym Mhen-y-bont ar Ogwr fynychu dosbarthiadau hunanamddiffyn am ddim i wella hunanhyder a theimlad o ddiogelwch personol.

Rydym wedi ymuno â Chyngor Bwrdeistref Sirol Pen-y-bont ar Ogwr i ddarparu dosbarthiadau am ddim, gyda'r nod o addysgu sgiliau hunanamddiffyn sylfaenol i gannoedd o fenywod a merched ledled Pen-y-bont ar Ogwr.

Bydd 300 o leoedd ar gael mewn nifer o sesiynau a gynhelir ar nos Fawrth a nos Iau, 6-8pm, drwy gydol mis Chwefror a mis Mawrth.

Bydd y sesiynau wedi eu lleoli yng Nghanolfan Hamdden Halo Pen-y-bont ar Ogwr a chânt eu cynnal gan arbenigwr hunanamddiffyn sydd wedi cynllunio sesiwn syml ond effeithiol ar ymwybyddiaeth sefyllfaol, gostegu gwrthdaro a hunanamddiffyn.

Dywedodd yr Arolygydd Diogelwch Cymunedol, Mike Rudall:

“Er mai bach iawn yw'r siawns o ddioddef trosedd, gwyddom fod troseddau penodol yn effeithio'n anghymesur ar fenywod a merched.

“Fel heddlu, rydym yn parhau i wneud cynnydd wrth fynd ati'n ddiflino i fynd ar drywydd cyflawnwyr y troseddau hyn a gweithio gyda phartneriaid i ddiogelu'r rheini sydd mewn perygl, ond rydym am wneud mwy. 

"Rydym ni'n cydnabod y gall menywod a merched deimlo'n fregus ac yn anniogel ar adegau.Ein gobaith yw y bydd y dosbarthiadau hyn yn apelio atynt gan rannu gwybodaeth a sgiliau sylfaenol i leihau eu pryderon."

Ariennir y fenter gan y Swyddfa Gartref dan y cynllun ‘Strydoedd Mwy Diogel’, ar ôl cais llwyddiannus gan Heddlu De Cymru a'n Comisiynydd yr Heddlu a Throseddu.

Gofynion ac amodau'r ymgeisydd:

• Rhaid iddynt fyw ym Mwrdeistref Pen-y-bont ar Ogwr
• Ar gael i fenywod a merched 16 oed a throsodd
• Ni fydd mwy nag un sesiwn y person
• Bydd yn rhaid i'r rheiny sy'n bresennol ddangos cadarnhad o'u harcheb

Nifer cyfyngedig o leoedd sydd ar gael felly trefnwch eich sesiwn yn gynnar er mwyn osgoi siom.

Bydd y sesiynau'n rhad ac am ddim.

I archebu eich lle, ewch i: Tocynnau Hunanamddiffyn i Fenywod a Merched sy'n byw yn Ardal Pen-y-bont ar Ogwr, Dyddiadau Amrywiol | Eventbrite